சென்னை IITயில் சேருகிறார் - அரசு பழங்குடியினர் பள்ளி மாணவி!

முயற்சி திருவினையாக்கும் என்பதற்கு சிறந்த உதாரணமாக ஜொலிக்கிறார் ராஜேஸ்வரி. அரசு பழங்குடியினர் உண்டு உறை விடப் பள்ளியில் படித்து சென்னை ஐஐடியில் இடம் கிடைத்துள்ள முதல் மாணவி இவர்.

- பேராச்சி கண்ணன்

ஐஐடி எனப்படும் இந்தியத் தொழில்நுட்பக் கழகத்தில் படிப்பது என்பது பல மாணவர்களின் கனவு. இந்தக் கல்வி நிறுவனத்தில் சேர்வதற்கு ஜேஇஇ மெயின்ஸ் மற்றும் ஜேஇஇ அட்வான்ஸ்டு என இரண்டு கட்டங்களாக நடக்கும் தேர்வில் வெற்றி பெறவேண்டும்.

முதல்கட்டமான ஜேஇஇ மெயின்ஸை கிளியர் செய்தால்தான் இரண்டு கட்டமான அட்வான்ஸ்டுக்குத் தகுதி பெறமுடியும். இவை இரண்டிலும் தேர்ச்சி பெறுவது அவ்வளவு சுலபமானதும் அல்ல. ஜேஇஇ மெயின்ஸை கிளியர் செய்யும் சிலர், அட்வான்ஸ்டு தேர்வில் தோல்வியடைவதும் உண்டு.

ஆனால், இவை இரண்டையும் கிளியர் செய்து வெற்றி வாகை சூடியிருக்கிறார் ராஜேஸ்வரி. அதுமட்டுமல்ல. இதற்கு என்சிஇஆர்டி வெளியிடும் பாடப்புத்தகங்களை ஆழ்ந்து படிக்க வேண்டும். இதனாலேயே பலரும் ஜேஇஇ நுழைவுத்தேர்வுக்காகத் தனியாக கோச்சிங் செல்வார்கள்.

இதில் ராஜேஸ்வரியோ தமிழக அரசின் பழங்குடி நலத்துறையினர் வழங்கிய ஆன்லைன் பயிற்சி வகுப்பின் மூலமே படித்து வெற்றியை தன்வசமாக்கி இருக்கிறார்.

இதற்கிடையே அவரின் தந்தை புற்றுநோயால் இறந்து விட அந்தத் துயரத்திலிருந்து மீண்டு வந்து இந்தச் சாதனையைப் படைத்திருக்கிறார்.

இதனால்தான் தமிழக முதல்வர் மு.க.ஸ்டாலின் தன்னுடைய எக்ஸ் தளத்தில், 'தந்தையை இழந்தாலும் அவர் கனவைத் தன் நெஞ்சில் சுமந்து நனவாக்கியிருக்கும் ராஜேஸ்வரியின் சாதனைக்கு சல்யூட்' எனக் குறிப்பிட்டு பாராட்டி இருக்கிறார். அத்துடன் அவரின் உயர் கல்விச் செலவு மொத்தத்தையும் தமிழக அரசே ஏற்கும் எனவும் தெரிவித்திருக்கிறார்.

தற்போது செங்கல்பட்டு மாவட்டம் குமிழி கிராமத்தில் உள்ள அரசு பழங்குடி நலத்துறையினரின் ஏகலைவா மாதிரி உண்டு உறைவிடப் பள்ளியில் திறன் மேம்பாட்டுப் பயிற்சியை எடுத்து வருகிறார் ராஜேஸ்வரி. அவரிடம் பேசினோம்.

"ரொம்ப சந்தோஷமா இருக்கு. நான் இவ்வளவு தூரம் வந்ததற்கு ஆசிரியர்களும், என் குடும்பத்தினரும் தந்த ஊக்கமே காரணம். ஆசிரியர்கள் வழங்கிய பயிற்சியும் வழிகாட்டுதல்களும் சிறப்பானவை..." என அத்தனை உற்சாகமாகப் பேசுகிறார் ராஜேஸ்வரி.