அராத்து பையனின் சக்சஸ் ஸ்டோரி!

கோட் வெற்றிக்குப் பிறகு ஏஜிஎஸ் நிறுவனம் தயாரித்துள்ள படம் 'டிராகன்'. 'லவ் டுடே' பிரதீப் ரங்கநாதன் ஹீரோவாக நடிக்கும் படம் இது. இச்சினிமாவை இயக்குநர் அஸ்வத் மாரிமுத்து டைரக்ட் செய்திருக்கிறார்.

- எஸ்.ராஜா

இவர் 'ஓ மை கடவுளே' படத்தை இயக்கியவர். ரிலீஸ் பிசியிலும் பொறுமையாக பேச ஆரம்பித்தார் அஸ்வத் மாரிமுத்து.

'டிராகன்' யார்?

காலேஜ் லைஃப்ல மொத்த கலூரியையும் கன்ட்ரோல் எடுத்த மாதிரி சீனியர் ஸ்டுடண்ட் என்று ஒரு கேரக்டர் இருக்கும். அந்த ஸ்டுடண்ட்டை மொத்த காலேஜும் சேர்ந்து கொண்டாடும். திரும்பிய பக்கமெல்லாம் அவனைப் பற்றித்தான் பேசுவாங்க. அந்தக் கேரக்டருடைய ஃப்ரெண்ட்ஷிப் கிடைக்காதா என்று பசங்களிடையே போட்டியே நடக்கும்.

ஏனெனில் காலேஜ்ல அவன்தான் கெத்து. 'டாக் ஆஃப் த காலேஜ்' என்று கூட சொல்லலாம். இந்தக் கொண்டாட்டம் எல்லாம் அவனுடைய அறத்துக்காக இல்லாமல் அவனுடைய அராத்திற்காக இருக்கும்.

நிறைய அரியர்ஸ் இருக்கும். பண்ணாத அட்டகாசம் கிடையாது. அந்த மாதிரி என்னுடைய ஹீரோ, அதான் சார்... நம்ம டிராகனுக்கு நாற்பத்தி எட்டு அரியர்ஸ் இருக்கும். காலேஜ்ல அவர்தான் கெத்து.

ஆனால், இந்த மாதிரி பசங்க காலேஜை விட்டு வெளியே போனால் சீண்டுவதற்கு ஒருவர் இருக்கமாட்டார். அப்படியே கேரக்டர் மறந்துடுவாங்க.

அந்த மாதிரி காலேஜ்ல இருக்கிறவரைதான் ஹீரோ. வெளியே வந்துட்டா ஜீரோ. கெத்து காட்டும் அந்த மாணவன் பற்றிய கதைதான் 'டிராகன்'.

இந்த இடத்துல டிராகனுடைய பாசிட்டிவ்வையும் சொல்லணும். டிராகன் படிக்காத மக்கு கிடையாது. படிப்புல கில்லி. அவனுடைய காலேஜ்ல நல்லா தொண்ணூறு சதவீதத்துக்கு மேல மார்க் எடுக்கிறவங்களுக்குதான் சீட் கிடைக்கும். அதிலிருந்து டிராகன் பிளஸ் டூல் எவ்வளவு மார்க் எடுத்திருப்பான்னு தெரிஞ்சுக்கலாம்.

டிராகன் வாழ்க்கை மாறிய இடம் காலேஜ். அதற்கு காரணம் ஒரு பொண்ணு. நல்லா படிச்சா பொண்ணுங்களுக்குப் பிடிக்கும்னு நம்பிட்டிருந்தான். ஒரு கட்டத்துல பொண்ணுங்களுக்கு அராத்து மாதிரி பசங்களைத்தான் பிடிக்குதுன்னு தெரிஞ்சதும் அட்டென்ஷனுக்காக தன்னையும் அப்படி மாத்திக்கிட்டான்.

காலேஜ் லைஃப்ல இருந்து வெளியே வந்த பிறகுதான் ரியாலிட்டி வேற என்பது புரியுது. அந்த உலகத்தில் அவன் எப்படி மேலே வருகிறான் என்பதை ஃபேமிலி டிராமாவா சொல்லியிருக்கிறேன்.