பாரம்பரியச் சங்கிலியை அறுக்க முயலும் பாலிவுட் படங்கள்

இன்றைய பாலிவுட் திரையுலகம் பற்றிய ஒரு விமர்சனக் குறிப்பைக் கண்டபோது, திரைப்படங்களின் வழியே “தயாரிக்கப்படும்” பொதுக் கருத்து பற்றிய சிந்தனை விரிகிறது, அது ஒரு கவலையைத் தருகிறது.

- 

குறிப்பாக அண்மை ஆண்டுகளில் வெளியான 'தி காஷ்மீரி ஃபைல்ஸ்', 'தி கேரளா ஸ்டோரி' 'தி சபர்மதி ரிப்போர்ட்' ஆகிய படங்களை விசாரணைக்கு உட்படுத்தும் திறனாய்வாளர்கள் அவை கலைப் படைப்பாளிகளின் இயற்கையான வெளிப்பாடாக இல்லை, உள்நோக்கம் கொண்ட செயற்கையான தயாரிப்புகளாகவே இருக்கின்றன என்கிறார்கள். அப்படிப்பட்ட தயாரிப்புகளுக்கு வரி விலக்கு, அதிகார பீடங்களின் அங்கீகாரம் ஆகியவை திரைப்படத் துறையை ஆளுங்கட்சியின் ஒரு பிரச்சார அணியாக மாற்றுகின்றன என்று விமர்சிக்கிறார்கள்.

சமூக நிகழ்வுகளால் மனக்குளத்தில் உண்டாகும் அலைகள் கலை-இலக்கியமாகப் பரிணமிக்கிறபோது அரசியல் பேசுவது புதிதல்ல. அன்றைய இதிகாசங்கள் அரசியலையும் பேசுவதால்தான் இன்றைக்கும் துணை வருகின்றன. நாவல்கள், நாடகங்கள் உள்ளிட்ட ஆக்கங்களில் அரசியல் அக்கறை இருந்து வந்திருக்கிறது. பொதுவாக அவை அந்தந்தக் காலத்தின் அரசுகளைச் சாடியிருக்கின்றன. ஆள்வோரின் அத்துமீறல்களால் ஏற்படும் சமுதாய பாதிப்புகளைச் சுட்டிக்காட்டியிருக்கின்றன. தமிழ் மண்ணில் அரசர்களை எள்ளி நகையாடும் தெருக்கூத்துகள் ஊர் ஊராய்ச் சென்றிருக்கின்றன.

பாரம்பரியத்துக்குக் கைவிலங்கு

ஒரு பெண் பாலியல் தொழிலாளியாக மாறுவதை, ஒரு குழந்தை சாலைச் சந்திப்புகளில் கையேந்தி வருவதை ஒரு கதை சித்திரிக்கிறது என்றால், அதில் மக்களுக்கு வறுமையை வழங்கும் அரசாங்க அநீதியை விமர்சிக்கும் படைப்புலகப் பாரம்பரியம் இருக்கிறது. ஆனால், கார்ப்பரேட் விசுவாச, மதவாத அரசியலுக்குச் சாதகமாகக் கதை-திரைக்கதை எழுதப்படுமானால் அந்தப் பாரம்பரியத்துக்கு விலங்கிடப்படுகிறது.