പൂമ്പാറ്റച്ചേലും തേടി...

ശലഭങ്ങൾക്ക് മലയാളം പേരുകൾ ഇപ്പോഴുണ്ടല്ലോ

- രാമകൃഷ്ണൻ കുമരനല്ലൂർ

ചിത്രശലഭങ്ങളുടെ ലോകം മനോഹരവും വൈവിധ്യ പൂർണ്ണവുമാണ്. പക്ഷികളെപ്പോലെ ശബ്ദംകൊണ്ടു തിരിച്ചറിയാനാവില്ല, കണ്ണുകൊണ്ട് പിടിച്ചെടുക്കുക തന്നെ വേണം. പല നിറങ്ങൾ വാരിപ്പൂശിയ ചിറകുകളും പറക്കൽ താളവും നിങ്ങളും ശ്രദ്ധിച്ചിട്ടില്ലേ?

പൂച്ചെടികളുള്ള ഇടങ്ങളിൽ ശലഭങ്ങളുണ്ടാവും. നമ്മൾ വച്ചുപിടിപ്പിക്കുന്ന ചെടികളിൽ മാത്രമല്ല പൂവുള്ളത് എന്നതും മറക്കാതിരിക്കുക.

മുറ്റത്ത്, തൊടിയിൽ, വയലിൽ, കുന്നിൻചരിവിൽ, പുഴയോരത്തിൽ... ഒന്നിറങ്ങി നടന്നാൽ പല ശലഭങ്ങളും ശ്രദ്ധയിൽപ്പെടും. പൂമ്പാറ്റകളെ കണ്ടെത്തണമെന്ന മനസ്സോടെ, താല്പര്യത്തോടെ ഒറ്റയോ വീട്ടുകാരോടോ കൂട്ടുകാരോടോ ഒപ്പമോ നടന്നു നോക്കൂ. അതുവരെ ശ്രദ്ധയിൽപ്പെട്ടിട്ടില്ലാത്ത ഒരത്ഭുതം പ്രകൃതി എപ്പോഴും എവിടെയെങ്കിലും നമുക്കായി ഒരുക്കിവച്ചിട്ടുണ്ടാവും! ഇങ്ങനെ അരിച്ചരിച്ചു പോകുമ്പോൾ നിന്റെ മുഖത്ത അറപ്പും വെറുപ്പും ഞാൻ കാണുന്നുണ്ട്. നോക്കിക്കോ ഒരു ചിത്രശലഭമായ് ഞാൻ മടങ്ങിവരും. (പുഴു - പി. സുരേന്ദ്രൻ)

ചില ചെടികളുടെ ഇലകൾ പുഴു കരണ്ടതുപോലെ കണ്ടിട്ടില്ലേ? ഇലകൾ ശ്രദ്ധാപൂർവം നോക്കൂ. ചിലപ്പോൾ ശലഭപ്പുഴുവിനെ (ലാർവ കാണാൻ സാധിക്കും. തീറ്റപ്രിയരാണവർ. ഓരോ ശലഭവും മുട്ടയിടുന്നത് പ്രത്യേക ചെടികളിലായിരിക്കും. മിക്ക ശലഭങ്ങളുടെയും കാര്യമെടുത്താൽ, മുട്ട വിരിഞ്ഞു വരുന്ന പുഴു തിന്നുന്നത് ആ സസ്യത്തിന്റെ ഇല തന്നെയായിരിക്കും. അതാണ് അതിന്റെ ആഹാരച്ചെടി എന്നർഥം.

പുഴുക്കൾ പല നിറത്തിലും ആകൃതിയിലുമാണ്. അവയെ കണ്ടെത്തുന്നത് രസകരം തന്നെ.