ഡീറ്റെയിലിംഗ് അക്കാദമി ഡീറ്റെയിലായി പഠിക്കാം കാർ ഡീറ്റെയിലിംഗ്

ഗോവയിൽ പുതിയ സെന്റർ തുടങ്ങാനും, ഇന്ത്യയിലുടനീളവും, ദുബായിലേക്കുമുള്ള ബിസിനസ് വ്യാപനവും ലക്ഷ്യമിടുന്നു.

- 

കാർ വാഷ് എന്ന് കേൾക്കുമ്പോൾ, ഓയിലും ഗ്രീസും നിറഞ്ഞ കരിപുരണ്ട ജോലിയെന്ന് നെറ്റി ചുളിച്ചിരു ന്ന ഒരു കൂട്ടം മനുഷ്യർക്കിടയിൽ നിന്ന് കാർ ഡീറ്റെയിലിംഗ് പഠിപ്പിക്കാ ൻ സ്വന്തമായി അക്കാദമി തുടങ്ങിയ ഒരു സംരംഭകനുണ്ട്. ഇന്ന് ഓ ട്ടോമോട്ടീവ് ഡീറ്റെയിലിംഗ് ഇൻഡസ്ട്രിയിലെ പ്രമുഖ ബ്രാൻഡായി മാറിയ ഡീറ്റെയിലിംഗ് അക്കാദമി ഡോട്ട് ഇന്നിന്റെ അമരക്കാരൻ തൃശൂർ ജില്ലയിലെ ചാവക്കാട് മുല്ലശ്ശേരി സ്വദേശി ഷെമീം അക്ബർ. 2012ൽ എറണാകുളം എരൂർ ആസ്ഥാനമാക്കിയാണ് ഷെമീം ഡീറ്റെയിലിംഗ് അക്കാദമിയ്ക്ക് തുടക്കമിടുന്നത്. ഐടി പ്രൊഫഷനും, പ്രവാസ ജീവിതവും വിട്ട് ബിസിനസിലേക്കിറങ്ങിയ ഷെമീമിന്റെ യാത്ര ആരെയും പ്രചോദിപ്പിക്കുന്നതാണ്. 

കംപ്യൂട്ടറിൽ നിന്ന് കാർ വാഷിലേക്ക്

പഠനകാലം തൊട്ടേ സ്വന്തമായി ഒരു ബിസിനസ് തുടങ്ങണമെന്ന ആഗ്രഹമുണ്ടായിരുന്നു ഷമീമിന് പക്ഷേ ജീവിതത്തിന്റെ നാലറ്റം കൂട്ടിമുട്ടിക്കാൻ സ്വന്തം നാടും വീടും വിട്ട് ഗൾഫിലേക്ക് കടൽകടന്ന കുടുംബക്കാരായിരുന്നു ചുറ്റും. ഉപ്പയും, മാമയുമടക്കം പ്രവാസികൾ. ബിസിനസിൽ താൽപര്യവും, മുൻപരിചയവുമില്ലാത്ത കുടുംബം. ഇലക്ട്രോണിക്സ് ബിരുദ ശേഷം, ആദ്യ ക്യാംപസ് പ്ലേസ്മെന്റിൽ വിദേശത്ത് ജോലി കിട്ടി. ബഹ്റൈനിലെ ജീവിതം ഷമീമിനെ ഒരു ഐടി പ്രൊഫഷണലായി പരുവപ്പെടുത്തി. അപ്പോഴും സംരംഭക മോഹം ഉള്ളിൽ കിടന്നു. തൊഴിലിടത്തിലെ സ്ഥിരതയുള്ള ഇന്റർനെറ്റ് കണക്ടിവിറ്റി, ബിസിനസ് ഗവേഷണങ്ങൾക്ക് ഊർജ്ജമായി. കാർവാഷ്, കാർ ഡീറ്റെയിലിംഗ് സേവനങ്ങൾക്ക് വിദേശ രാജ്യങ്ങളിലുള്ള ഉയർന്ന ശമ്പളവും, പ്രൊഫഷണൽ മൂല്യവും തിരിച്ചറിഞ്ഞു. വാഹനപ്രേമി കൂടിയായ ഷമീം, കാർ ഡീറ്റെയിലിംഗിന്റെ ബിസിനസ് സാധ്യതകളിലേക്ക് തിരിയുന്നത് അങ്ങനെയാണ്.