ടാറ്റ സിയറ

കാലിക ഡിസൈനും മികച്ച ഇന്റീരിയർ സ്പേസും നൂതന ഫീച്ചറുകളും അതിസുരക്ഷയുമൊക്കെയായി സിയായുടെ രണ്ടാം വരവ്

- നോബിൾ എം. മാത്യു

മിഡ് സൈസ് എസ് യു വി വിപണിയിൽ നിലവിലെ താരങ്ങൾക്കു കടുത്ത വെല്ലുവിളി ഉയർത്തിയാണ് ടാറ്റയുടെ പുതിയ മോഡൽ സിയറ രംഗപ്രവേശം ചെയ്തിരിക്കുന്നത്. ഹ്യുണ്ടേയ് ക്രേറ്റ, ടൊയോട്ട അർബൻ സർ, മാരുതി ഗ്രാൻഡ് വിറ്റാര, കിയ സെൽറ്റോസ് തുടങ്ങിയ മിഡ്സ് എസ് യു വികളുമായി ഏറ്റുമുട്ടാനെത്തിയ സിയറയിൽ സെഗ്മെന്റിലെ തന്നെ മികച്ച ഫീച്ചറുകളാണ് ടാറ്റ ഉൾക്കൊള്ളിച്ചിരിക്കുന്നത്. 1991ൽ ടാറ്റ വിപണിയിലിറക്കിയ ആദ്യ ഇന്ത്യൻ നിർമിത എസ് യു വി ആയിരുന്നു സിയറ. 2003ൽ ആണ് വിപണിയിൽ നിന്നു പിൻവാങ്ങുന്നത്. ഡിസൈൻ, ഫീച്ചേഴ്സ്, സേഫ്റ്റി, പെർഫോമൻ സ് എന്നിവയിലെല്ലാം പുതുമകളുമായാണ് പുതിയ വരവ്. വിശദമായ ടെസ്റ്റ് ഡ്രൈവിലേക്ക്...

ക്ലാസിക് ആൻഡ് ബോൾഡ്

പഴയ സിയറയിൽ നിന്നു പുതിയ സിയറയിലേക്ക് എത്തുമ്പോൾ ക്ലാസിക് ലുക്കിനൊപ്പം കാലികമായ ഡിസൈൻ ഘടകങ്ങളും ഒപ്പം എസ് യു വിയുടെ ബോൾഡ് ലുക്കും സമന്വയിക്കുന്നു. വലുപ്പത്തിൽ ടാറ്റ ഹാരിയറിനു താഴെയാണ് സ്ഥാനം. സെഗ്മെന്റിലെ എതിരാളികളെക്കാളും വലുപ്പക്കൂടുതലു ണ്ടെന്നതാണ് ഒരു പ്ലസ് പോയിന്റ്. റോഡ് പ്രസൻസിലും അകത്തെ ഇടത്തിലും ഇതു കാര്യമായി ഗുണം ചെയ്തിട്ടുണ്ട്. ചതുരവടിവൊത്ത രൂപം, കനം കുറഞ്ഞ ഫുൾവിഡ് ഡേ ടൈം റണ്ണിങ് ലാംപ്, വെൽകം ലൈറ്റിങ് ഫീച്ചറോടു ഗുഡ്ബൈ കൂടിയതാണ്. വാഹനത്തിന്റെ വേഗം കൂടുന്നതനുസരിച്ച് പ്രകാശത്തിന്റെ തീവ്രത കൂടുന്ന ബൈ എൽഇഡി പ്രൊജക്ടർ ഹെഡ്ലാംപാണ്. കനം കുറഞ്ഞ ഇതിന്റെ ഡിസൈൻ മനോഹരം. പിക്സൽ ആകൃതിയിലുള്ള ഫോഗ്ലാംപുകൾ. പിയാനോ ബ്ലാക് ഫിനിഷിലുള്ള ഗ്രില്ലിൽ കുത്തനെയുള്ള ചെറിയ ഡിസൈൻ എലമെന്റുകൾ. പിയാനോ ബ്ലാക് ഫിനിഷിൽത്തന്നെയുള്ള വലിയ ബംപർ. അതിൽ സിൽവർ ഫിനിഷ് സ്കിഡ് പ്ലേറ്റ് നൽകിയപ്പോൾ എടുപ്പും ഗാംഭീര്യവും കൂടി. റേഞ്ച് റോവർ വാഹനങ്ങളിൽ കാണുന്ന തരത്തിലുള്ള ക്ലാം ഷെൽ ഡിസൈനാണ് ബോണറ്റിന്. എ പില്ലർ ഭാഗത്ത് ബോണറ്റ് ഡോറിലേക്കു ചേരുന്ന ഡിസൈനാണിത്. മാത്രമല്ല, ഡോർബീഡിങ്ങുകൾ പുറത്തേക്കു കാണാത്ത തരത്തിലുള്ള രൂപകൽപനയും പ്രീമിയം ടച്ച് നൽകുന്നു.

പിയാനോ ബ്ലാക് ഫിനിഷിലുള്ള വലിയ വീൽ ആർച്ചുകളും ക്ലാഡിങ്ങുകളും വശങ്ങൾക്ക് മാസ്ലുക്ക് നൽകുന്നു. വാഹനത്തിന്റെ ബോഡിയോടു ചേർന്നുനിൽക്കുന്ന ഫ്ലഷ് ടൈപ് ഡോർ ഹാൻഡിലുകളാണ്.