അച്ഛന്റെ ബുള്ളറ്റ് പ്രൂഫ്, അച്ചന്റെ മറുപടി

COFFEE BREAK

- വിനോദ് നായർ

മണിമുഴക്കം ഫിനാൻസ് കമ്പനിയുടെ ഉടമയായ ഫിലിപ് അന്ത്രയോസ് കൂടാരത്തിൽ അർധരാത്രിയിൽ ദുഃസ്വപ്നം കണ്ടു ഞെട്ടിയുണർന്നു. അരികിൽ കിടന്നുറങ്ങുന്ന ഭാര്യ രമണിയെ കുലുക്കി വിളിച്ചു: “മരണീ, സോറി രമണീ, എഴുന്നേറ്റേടീ. നമ്മുടെ മകൻ! വെപ്രാളം വരുമ്പോൾ ഫിലിപ്പിനു പേരുകൾ തെറ്റിപ്പോകും. വികാരിയച്ചന്റെ പേരു മാറിപ്പോയതാണ് അവസാനത്തെ സംഭവം. കഴിഞ്ഞയാഴ്ച അതിരാവിലെ അച്ചന്റെ വീട്ടിൽച്ചെന്നപ്പോൾ വളർത്തുനായ ടോമി കുരച്ചു ചാടി വന്നു. പേടിച്ചോടുന്നതിനിടെ ഫിലിപ് വിളിച്ചുപറഞ്ഞതിങ്ങനെ: "അച്ചനെ പൂട്ടിയിടെടാ ടോമി.

മകൻ സജിൻ ഫിലിപ് കൂടാരത്തിൽ ഓടിച്ച ബൈക്ക് അപകടത്തിൽപ്പെട്ടു എന്ന സ്വപ്നം കണ്ടാണ് ഫിലിപ് രാത്രി ഞെട്ടിയുണർന്നത്. പുറത്തിറങ്ങി ലൈറ്റിട്ടു നോക്കി. മകന്റെ ബൈക്ക് കെടിഎം ഡ്യൂക്ക് പോർച്ചിൽത്തന്നെയുണ്ട്. മകന്റെ മുറിയിൽ വെളിച്ചവുമുണ്ട്. അവൻ ഉറങ്ങിയിട്ടില്ല.

രണ്ടു മൂന്നു ദിവസമായി ഇതേ സ്വപ്നംതന്നെ കണ്ടതോടെ ഫിലിപ് ഭാര്യയോടു പറഞ്ഞു: "ഈയിടെയായി എനിക്കൊട്ടും സമാധാനമില്ലെടീ. നമ്മുടെ മകൻ എവിടെയെങ്കിലും ചെന്ന് അപകടത്തിൽപ്പെടുമെന്ന് ഒരു പേടി. അവന്റെ ബൈക്ക് വിൽക്കണം.

എന്താണ് വഴി?' ഭാര്യ ചോദിച്ചു: