ലഹരിക്കെതിരെ ഒരു സൈക്കിൾ യാത്ര

കേരളത്തിൽനിന്ന് നേപ്പാളിലേക്ക് സൈക്കിൾ യാത്ര നടത്തി യുപി സ്കൂൾ അധ്യാപകനായ പ്രണവ് രാജ്

- അശ്വതി പങ്കജ്

"യാത്രകളെപ്പോഴും ഓരോ പാഠ ങ്ങളാണ്. അത് ഒരു അധ്യാപകൻ നടത്തുമ്പോൾ മറ്റുള്ളവർക്കു പറഞ്ഞു കൊടുക്കാൻ പറ്റുന്ന പുതിയ പാഠങ്ങളാകും.

സ്കൂളടച്ച് വേനലവധി ആയിട്ടും താണിക്കുടം യുപി സ്കൂളിലെ അധ്യാപകനു വിശ്രമമില്ല. കാരണം വേറൊന്നുമല്ല, മാഷ് യാത്രയിലായിരുന്നു. മാഷെന്നു പറയുമ്പോൾ അധികം വയസ്സൊന്നുമില്ല, വെറും 24. കുട്ടികൾ കഴിഞ്ഞാൽ സന്തതസഹചാരിയായി കൂടെയുള്ളതു യാത്രയാണ്. കുട്ടികൾക്ക് അറിവു പകർന്നു കൊടുക്കുന്നതിനപ്പുറം അധ്യാപകന് എന്താണു റോളെന്ന് ചോദിക്കുന്നിടത്താണ് പ്രണവ് രാജ് എന്ന ഈ അധ്യാപകൻ വേറിട്ടുനിൽക്കുന്നത്. പ്രണവിന്റെ യാത്രകൾ എന്നാൽ ആ യാത്രകൾക്ക് എന്തെങ്കിലും പ്രത്യേകതയും ഉണ്ടാകും. പുതിയ സ്ഥലങ്ങൾ സന്ദർശിക്കുക എന്നതിലുപരി വ്യത്യസ്തമായ സന്ദേശം കുട്ടികളിൽ, യുവാക്കളിൽ, ജനങ്ങളിൽ എത്തിക്കുക എന്നതാണ് ഓരോ യാത്രയിലും ലക്ഷ്യം വയ്ക്കുന്നത്. ഇത്തവണയും അത്തരമൊരു യാത്രയാണ് അതും സൈക്കിൾ യാത്ര നടത്തിയിരിക്കുകയാണു പ്രണവ്. സൈക്കിളിൽ താണ്ടിയതാകട്ടെ 2900 കിലോമീറ്റർ. അന്ന് കശ്മീരാണെങ്കിൽ ഇന്നത് എത്തിനിൽക്കുന്നത് നേപ്പാളിൽ. ഇത്തവണ യാത്ര ലഹരിക്കെതിരെയാണ്. 'Teach, Ride, Inspire & Say No To Drugs' എന്ന സന്ദേശവുമായാണ് കേരളത്തിൽ നിന്നും നേപ്പാളിലേക്ക് സൈക്കിൾ യാത്ര നടത്തിയത്.

ഈ യാത്ര ലഹരിക്കെതിരേ...

എവിടെ നോക്കിയാലും ലഹരിയെപ്പറ്റിയുള്ള വാർത്തകളാണ്. സ്കൂൾ കുട്ടികളുടെ ഇടയിലും യുവാക്കൾക്കിടയിലും മയക്കു മരുന്നിന്റെ ഉപയോഗം കൂടുകയാണ്. അപ്പോൾ വളർന്നു വരുന്ന കുട്ടികൾക്കായി, നാടിനായി ലഹരിക്കെതിരെ പോരാടാനുറച്ചാണ് ഇങ്ങനൊരു വിഷയം തിരഞ്ഞടുത്തത്. സിനിമ ആയിക്കോട്ടെ റിയൽ ലൈഫിലെ സംഭവങ്ങളായിക്കോട്ടെ അതെല്ലാം കുട്ടികളെ സ്വാധീനിക്കുന്നുണ്ട്. ലഹരിക്കെതിരെ ബോധവൽക്കരണ ക്ലാസുകൾ ഒക്കെ നടക്കാറുണ്ട്. പക്ഷേ, അതിൽനിന്നു മാറി ലഹരിക്കെതിരെ കുട്ടികളെ ബോധവാൻമാരാക്കാൻ കൂടിയാണ് ഇങ്ങനൊരു യാത്ര.

എന്തുകൊണ്ട് നേപ്പാൾ?

ആദ്യമായിട്ടല്ല ഞാൻ ഇത്തരമൊരു യാത്ര ചെയ്യുന്നത്. ഇതിനു മുൻപും മറ്റു സംസ്ഥാനങ്ങളിൽ പോയിട്ടുണ്ട്. അതും സൈക്കിൾ യാത്രയായിരുന്നു.