കുട്ടി ഡ്രൈവർമാരേ....പിടി വീണാൽ പെട്ടു മോനേ...

പിടിച്ചാൽ ലൈസൻസ് കിട്ടണമെങ്കിൽ 25 വയസുവരെ കാത്തിരിക്കേണ്ടിവരും

- റോഷ്‌നി

വീട്ടുകാരുടെ ആശീർവാദത്തോടെയാണെങ്കിലും അല്ലെങ്കിലും വണ്ടിയെടുത്തു കറങ്ങിനടക്കുന്ന കൂട്ടുകാർ കരുതിയിരുന്നോളൂ. പിടിക്കപ്പെട്ടാൽ ജീവിതകാലം മുഴുവൻ അനുഭവിക്കാനുള്ള യോഗം കാണുന്നുണ്ട്

അച്ഛനും പ്രതി!

പ്രായപൂർത്തിയാകാത്ത മകൻ സ്കൂട്ടർ ഓടിച്ച് അപകടത്തിൽ മരിച്ച സംഭവത്തിൽ അച്ഛനെയും പ്രതിയാക്കി. മകനു സ്കൂട്ടർ ഓടിക്കാൻ അനുവാദം കൊടുത്തതിന്റെ പേരിലാണ് കേരള മോട്ടർ വാഹന നിയമപ്രകാരം വാഹനത്തിന്റെ രജിസ്ട്രേഡ് ഉടമ കൂടിയായ പിതാവ് പ്രതി ചേർക്കപ്പെട്ടത്. രാത്രി കൂട്ടുകാരനുമായി സിനിമയ്ക്കു പോയതായിരുന്നു പതിനാറുകാരൻ. എതിരെ വന്ന കാർ സ്കൂട്ടറിൽ വന്നിടിക്കുകയും സ്കൂട്ടർ ഓടിച്ച പതിനാറുകാരൻ മരിക്കുകയും ചെയ്തു. രണ്ടുമാസം മുൻപ് ചങ്ങനാശേരിയിൽ നടന്ന അപകടത്തെക്കുറിച്ചുള്ള വാർത്തയാണിത്. ഇവിടെ ആരാണ് കുറ്റക്കാരൻ? പ്രായപൂർത്തിയാകാത്ത മകനോ അതോ സ്കൂട്ടർ കൊടുത്ത അച്ഛനോ അതോ കാറോടിച്ചയാളോ?

"പിള്ളേരല്ലേ... അവർ വാഹനം ഓടിക്കണമെന്നാവശ്യപ്പെട്ടാൽ അതങ്ങു സാധിച്ചു കൊടുത്തേക്കണം. എന്നായാലും അവർ ഡ്രൈവിങ് പഠിച്ചിരിക്കേണ്ടവരല്ലേ ഇത്തരം ചിന്തകളുള്ള രക്ഷിതാക്കളുണ്ട് നമുക്കു ചുറ്റും. അവനു വണ്ടിയോടിക്കാനറിയാം എന്ന് അഭിമാനത്തോടെ പറയുന്നവർ. എന്നാൽ സ്വന്തം കുട്ടികളോട് ചെയ്യാവുന്ന ഏറ്റവും വലിയ ക്രൂരതകളിലൊന്നാണിത്.