நாவிற்கினிய ஜாம் வகைகள்!

பழங்கள் அதிகமாக கிடைக்கும் நேரத்தில் பழ ஜாம்களை வீட்டிலேயே தயாரிக்கலாம். குழந்தைகளுக்கு இட்லி, தோசை, சப்பாத்தி பிரட் என்ற எல்லாவற்றிலும் சேர்த்து சாப்பிட வைக்கலாம்.

- உஷாமுத்துராமன்

கடைகளில் வாங்கும் ஜாம்களில் அதிக நாள் கெடாமல் இருப்பதற்காக சில வேதியல் பொருட்களை கலப்பார்கள் என்பதால் நாமே தயாரித்து குழந்தைகளுக்கு கொடுக்கும்போது அது ஆரோக்கியமாகவும் அவ்வப்போது பிரஷாகவும் இருப்பது தான் உண்மை. மிக எளிதாகவும் வேகமாகவும் தயாரிக்க கூடிய சில ஜாம் வகைகளை பார்க்கலாம்.

அன்னாசிப்பழம் ஜாம்

தேவையான பொருட்கள்: அன்னாசி பழம் - ஒன்று, சர்க்கரை - 300 கிராம், அன்னாசிப்பழ எசன்ஸ் - சிறுதுளிகள், ஏலக்காய் - தேவையான அளவு, டியூட்டிபுருட்டி - தேவையான அளவு, நெய் - ரெண்டு ஸ்பூன், பசும்பால் - ஒரு கப்

செய்முறை: நல்ல பழுத்த அன்னாசி பழத்தின் தோலை சீவி சிறு சிறு துண்டுகளாக நறுக்கிக் கொள்ளவும். நறுக்கிய அன்னாசி பழ துண்டுகளுடன் அதன் எசன்சையும் பசும்பாலையும் சேர்த்து கூழ் போல் அரைத்துக் கொள்ளவும். ஒரு அடி கனமான பாத்திரத்தில் சர்க்கரை போட்டு சிறிதளவு நீர் ஊற்றி, பிறகு கிளறவும். அதில் ஒரு ஸ்பூன் நெய்யை ஊற்றி சிறிதளவு உருட்டிப் பார்க்க அது தக்காளிப் பழம் போல் வந்தவுடன் அதன் மீது அரைத்து வைத்துள்ள அன்னாசிப்பழக் கூழையும் போட்டு நன்றாக கிளறி ஏலப் பொடியையும் டியூட்டிப்ருட்டியையும் மீதமுள்ள நெய்யையும் போட்டு கைவிடாமல் கிளறவும். பாத்திரத்தில் ஒட்டாமல் வரும்போது கீழே இறக்கி வைத்துவிட்டு ஆறிய பிறகு எடுத்து ஒரு ஜாடியில் போட்டு வைத்தால் சுவையான அன்னாசி பழ ஜாம் தயார்.

நெல்லிக்காய் ஜாம்

தேவையான பொருட்கள்: நெல்லிக்காய் - கால் கிலோ சர்க்கரை - 400 கிராம், ஏலப்பொடி - சிறிதளவு, நெய் - இரண்டு ஸ்பூன்.

செய்முறை: நெல்லிக்காய்களை நன்றாக கழுவி குக்கரில் தண்ணீர் இல்லாமல் வேகவைத்து கொள்ளவும். பிறகு அதில் உள்ள விதைகளை எடுத்துவிட்டு நெல்லிக்காயை மிக்ஸியில் சிறிது நீர் சேர்த்து கூழ் போல் அரைத்துக் கொள்ளவும். ஒரு அடி கனமான பாத்திரத்தில் சர்க்கரை சேர்த்து சிறிது நீரை ஊற்றி கிளறி சக்கரை கரைந்ததும் அரைத்து வைத்துள்ள நெல்லிக்காய் கூழை போட்டு நெய்யை ஊற்றி கிளறவும். பிறகு ஏலப் பொடியையும் போட்டு பாத்திரத்தில் ஒட்டாமல் வரும்போது கீழே இறக்கி வைத்து விட்டு ஒரு ஜாடியில் எடுத்து வைத்தால் சுவையான நெல்லிக்காய் ஜாம் தயார்.