തിരിച്ചറിയാം ഓട്ടിസം

ഓട്ടിസം സ്പെക്ട്രം ഡിസോർഡർ എന്ന അവസ്ഥയെക്കുറിച്ചു വായനക്കാരുടെ സംശയങ്ങൾക്കു വിദഗ്ധർ നൽകുന്ന മറുപടി

- ഡോ. എം.കെ.സി. നായർ ശിശുരോഗ ചികിത്സാ വിദഗ്ധൻ മാനസികാരോഗ്യ വിദഗ്ധൻ കേരള ആരോഗ്യ സർവകലാശാല മുൻ വൈസ്ചാൻസലർ ഡോ. സാനി വർഗീസ് ക്ലിനിക്കൽ സൈക്കോളജിസ്റ്റ് ഗവ. മാനസികാരോഗ്യ കേന്ദ്രം, പേരൂർക്കട, തിരുവനന്തപുരം

ഗായിക ജ്യോത്സ്ന തനിക്ക് ഓട്ടിസം ഉണ്ടന്ന വിവരം പങ്കുവച്ചത് അടുത്തിടെയാണ്. ഓട്ടിസം സ്പെക്ട്രം ഡിസോർഡറിന്റെ സ്വഭാവ സവിശേഷതകളുള്ള ഹൈമാസ്കിങ് ഓട്ടിസമാണു തനിക്കെന്നാണു ജ്യോത്സ്ന വെളിപ്പെടുത്തിയത് ഇതോടെ ഓട്ടിസം സ്പെക്ട്രം ഡിസോർഡർ എന്ന അവസ്ഥ വീണ്ടും ചർച്ചകളിൽ നിറയുകയാണ്. എന്താണ് ഓട്ടിസം സ്പെക്ട്രം ഡിസോർഡർ എന്ന അവസ്ഥ? ഓട്ടിസം എങ്ങനെയാണു നിർണയിക്കാനാകുക? ഇത്തരം സംശയങ്ങൾക്കും ഓട്ടിസം കണ്ടെത്തിയാൽ പിന്തുടരേണ്ട ചികിത്സാരീതിയെക്കുറിച്ചും വിദഗ്ധർ നൽകുന്ന മറുപടി അറിയാം

ഒരേ പേര് ; പല അവസ്ഥകൾ

തലച്ചോർ വികസിക്കുന്നതിലുണ്ടാകുന്ന വ്യതിയാനങ്ങളാണ് ഓട്ടിസം സ്പെക്ട്രം ഡിസോർഡർ എന്ന അവസ്ഥ ഉണ്ടാക്കുന്നത്. ആശയവിനിമയത്തിലുള്ള പ്രശ്നങ്ങൾ, സാമൂഹികമായ ഇടപെടൽ ഇവയെയാണു പ്രധാനമായി ഈ അവസ്ഥ ബാധിക്കുക. ഇത്തരം പല ലക്ഷണങ്ങൾ ചേർത്താണ് ഓട്ടിസം സ്പെക്ട്രം ഡിസോർഡർ എന്നു പറയുന്നത്.

ഓരോ കുട്ടിയിലും ഓരോ രീതിയിലാകും ഓട്ടിസത്തിന്റെ ലക്ഷണങ്ങളും സ്വഭാവസവിശേഷതകളും പ്രകടമാകുക. ആൺകുട്ടികളിൽ നാലു മടങ്ങു കൂടുതലായി ഈ അവസ്ഥ കാണാറുണ്ട്. കുഞ്ഞിന്റെ വളർച്ചയുടെ ആദ്യകാലഘട്ടങ്ങളിൽത്തന്നെ ഓട്ടിസം സ്പെക്ട്രം ഡിസോർഡറിന്റെ ലക്ഷണങ്ങൾ പ്രകടമാകും.

അവഗണിക്കരുതേ ലക്ഷണങ്ങൾ

പേരു വിളിക്കുമ്പോൾ ശ്രദ്ധിക്കാതിരിക്കുക, മറ്റുള്ളവർ ആശയവിനിമയം നടത്തുമ്പോൾ കണ്ണിൽ നോക്കാതിരിക്കുക ഇവയെല്ലാം തുടക്കത്തിലേ പ്രകടമാകാം. സംസാരം തുടങ്ങാനും വൈകും. കുട്ടികളിലെ ഭാഷാവികാസം വൈകുന്നുവെങ്കിൽ മാതാപിതാക്കൾ ശ്രദ്ധിക്കണം.