പോലീസ് സ്റ്റോറി

കോട്ടയം പട്ടണത്തിലൂടെ ഷാഹി കബീർ റോന്തിനു പോകുന്നു. പൊലീസ് കാലത്തെ ഓർമകളിലൂടെ യാത്ര

- വിജീഷ് ഗോപിനാഥ്

തിരക്കഥാകൃത്തിന്റെയും സംവിധായകന്റെയും വേഷം അണിയും മുൻപ് ഷാഹി കബീർ കോട്ടയം എആർ ക്യാംപിലെ സിവിൽ പൊലീസ് ഓഫിസറായിരുന്ന കാലം. നമ്പർ 7119. അച്ചടക്കം എന്ന വാക്കിന്റെ കാഠിന്യം കൊണ്ടു കട്ടയും പടവും മടങ്ങിയ പരിശീലനകാലം കഴിഞ്ഞു ശ്വാസമെടുക്കാൻ തുടങ്ങിയ സമയം.

അടച്ചു വച്ച എഴുത്തിനോടും സിനിമയോടും ഒക്കെയുള്ള ഇഷ്ടങ്ങൾ ഷാഹി പതുക്കെയെടുത്തു പോളിഷ് ചെയ്തു മിനുക്കി വച്ചു. ഒപ്പം സമാനഹൃദയരായ നാലഞ്ചു സുഹൃത്തുക്കളും ചേർന്നു. അവർ എആർ ക്യാംപിലെ കാന്റീൻ ഭിത്തിയിൽ ഒരു ചുമർ മാഗസിൻ തുടങ്ങി.

സഹപ്രവർത്തകരുടെ കഥയും കവിതയും കാർട്ടൂണുമെല്ലാം അക്ഷര വെളിച്ചമായി. അതുകഴിഞ്ഞ് ഷോർട്ഫിലിം ആയിരുന്നു. ഇൻഗ്ലോറിയസ് ലൈഫ്, മനോരമ ഓൺലൈൻ വഴി അതു പ്രേക്ഷകർക്കു മുന്നിലേക്കെത്തി. പിന്നെ, ജോസഫിന്റെയും നായാട്ടിന്റെയും ഓഫീസർ ഓൺ ഡ്യൂട്ടിയുടെയും തിരക്കഥകൾ. ഇലവീഴാപൂഞ്ചിറയുടെയും റോന്തിന്റെയും സംവിധായകൻ. ഒരു ദേശീയ അവാർഡും രണ്ടു സംസ്ഥാന അവാർഡുകളും. 2005 ൽ അണിഞ്ഞ യൂണിഫോം നാലുമാസം മുൻപ് ഷാഹി ഊരിവച്ചു. സേനയിൽ നിന്നു രാജിവച്ചു സിനിമയുടെ മാത്രമായി. പുതിയ സിനിമ റോന്ത് തിയറ്ററിൽ എത്തുന്നതിനു തൊട്ടുമുൻപ് വനിതയ്ക്കു വേണ്ടി ഷാഹി കോട്ടയത്ത് എത്തി. ഒപ്പം സഹപ്രവർത്തകനും തിരക്കഥാകൃത്തുമായ ജി. നിധീഷുമുണ്ട്. നിധീഷും ഷാജി മാറാടും ചേർന്നാണ് ഇലവീഴാപൂഞ്ചിറയുടെ തിരക്കഥ എഴുതിയത്. ഓർമകൾ യൂണിഫോമിട്ടു പരേഡിനൊരുങ്ങുകയാണ്.

റോന്ത് തുടങ്ങുന്നു

കാർ കോട്ടയം ബസേലിയസ് കോളജിനു മുന്നിലെത്തിയപ്പോൾ ഷാഹി കബീർ പറഞ്ഞു. ആലപ്പുഴ എസ്ഡി കോളജിൽ ലിറ്ററേച്ചറിനു ചേർന്നതാണ്. പക്ഷേ, അതു ക്യാൻസൽ ചെയ്ത് ബസേലിയസ് കോളജിലേക്ക് എത്തി. ക്യാംപസ് രാഷ്ട്രീയത്തിലേക്കു കടന്നതോടെ കാഴ്ചപ്പാടുകൾ മാറി. വായനയോടും കലാ പ്രവർത്തകരോടും എഴുത്തുകാരോടും സൗഹൃദം ഉണ്ടായി. ഇന്നത്തെ എന്നെ ഉണ്ടാക്കിയെടുത്തത് ബസേലിയസ് കോളജ് ആണെന്നു പറയാം. പക്ഷേ, പഠനം പകുതിക്കുവച്ചു നിന്നു. ഹാജർ കുറവു കാരണം ക്യാംപസിൽ നിന്നു പുറത്തേക്ക്. ആ കാലത്തു ജോലി അത്യാവശ്യമായിരുന്നു. പൊലീസ് എങ്കിൽ പൊലീസ്. അങ്ങനെയാണ് കാക്കിയണിയുന്നത്.