ശിവകാശി പട്ടാസ് പട്ടണം

വർഷം തോറും ആറായിരം കോടിയുടെ പടക്ക കച്ചവടം നടക്കുന്ന ശിവകാശിയിലേക്ക്...

- ' വിജീഷ് ഗോപിനാഥ്

കത്തുന്ന മത്താപ്പു പോലെ സൂര്യൻ തിളയ്ക്കുന്ന ശിവകാശിപ്പകൽ മാനത്തേക്കു നോക്കിയാൽ കണ്ണിൽ കമ്പിത്തിരി കത്തും. അതുപോലെ ചൂട്. പത്തു മണിക്കേ തുടങ്ങി നട്ടുച്ചപ്പൊള്ളൽ. നിരത്തിയിട്ട പടക്കങ്ങൾക്കൊപ്പം മനുഷ്യനും തീ വെയിലിൽ ഉണങ്ങിത്തുടങ്ങി.

എൻ എച്ച് 44 ലേക്കു വഴി തുറക്കുന്ന സട്ടൂർ റോഡ്. ശിവകാശി ബസ്സ്റ്റാന്റ് കഴിയുമ്പോഴേ നിരന്നുനിൽക്കുന്നുണ്ടു നിരവധി ഹോൾസെയിൽ പടക്കകടകൾ ഓരോന്നിന്റെയും പേരു വായിച്ചു പതുക്കെ കാറോടിച്ചു മുന്നോട്ടു പോയി. രണ്ടു കട കഴിയുമ്പോഴേക്കും ഒരു പടക്കക്കട. ആ മട്ടിലാണു നിരന്നിരിക്കുന്നത്.

പെട്ടെന്നു പിന്നിൽ രണ്ടു ഹോണടി തുടങ്ങി. ഹെഡ്ലൈറ്റ് മിന്നിക്കുന്നു ബൈക്കുകൾ.  വീണ്ടും വീണ്ടും ഹോണടിക്കുന്നു. കൈപൊക്കി കാണിക്കുന്നു. തല്ലാനെങ്ങാനും വരുന്നതാണോ? കാറിന്റെ സ്പീഡ് കൂട്ടി. കണ്ണാടിയിലൂടെ പിന്നിലേക്ക് ഒന്നുകൂടി നോക്കിയപ്പോൾ ഞെട്ടലും കൂടി. ഇപ്പോൾ നാലോ അഞ്ചോ ബൈക്കുകളുണ്ട്. കൈ ചൂണ്ടി സൈഡാക്കാൻ ആംഗ്യം കാണിക്കുന്നുമുണ്ട്.

എന്തിനാണു പാഞ്ഞുവരുന്നതെന്ന് ഒരു പിടിയും കിട്ടിയില്ല. രണ്ടും കൽപിച്ചു വണ്ടി നിർത്തി. അതോടെ ബക്ക് ഒതുക്കി ചാടിയിറങ്ങി അവർ ഓടി വന്നു. എന്തിനാണന്നറിഞ്ഞിട്ട് ഇടി കൊള്ളാമല്ലോ. പതുക്കെ ഗ്ലാസ് താഴ്ത്തി ചോദിച്ചു, “നൻപാ... എന്ന വിഷയം? പെട്ടെന്നു നാലഞ്ചു കൈകൾ നീണ്ടു വന്നു. എല്ലാത്തിലും പല നിറത്തിലുള്ള വിസിറ്റിങ് കാർഡുകൾ. അതുനോക്കിയപ്പോൾ കാര്യം പിടികിട്ടി. എല്ലാം പടക്കത്തിന്റെ ഏജന്റുമാരാണ്. നിരന്നിരിക്കുന്ന ഹോൾസെയിൽ കടകളിലേക്ക് തട്ടിക്കൊണ്ടുപോകുകയാണു ലക്ഷ്യം.

കേരള റജിസ്ട്രേഷൻ കാർ കണ്ടപ്പോൾ വിഷുവിനു പൊട്ടിക്കാനുള്ള പടക്കത്തിന് അഡ്വാൻസുമായി വന്നവരാണെന്നു കരുതി പാഞ്ഞു വന്നതാണ്. വരവിന്റെ ഉദ്ദേശം പടക്കം വാങ്ങാനല്ലെന്നു തിരിച്ചറിഞ്ഞതോടെ ആൾക്കൂട്ടം ഒഴിഞ്ഞു പോയി. ഒടുവിൽ വിൻസെന്റ് മാത്രമായി.

പതിനായിരങ്ങൾ, അതിൽ ഒരു മുഖം