ആ തുണിക്കു ഞാൻ പേരിടും സിസിലി

തുന്നൽക്കാരനിൽ നിന്നു തുടങ്ങി സംസ്ഥാന സർക്കാരിന്റെ അവാർഡ് വരെ കരസ്ഥമാക്കിയ മെൽവിന്റെ ജീവിതം

- ടെൻസി ജെയ്ക്കബ് 

സിനിമയുടെ റീലുകൾ വെള്ളിത്തിരയിൽ ഓടിത്തുടങ്ങി. ഞൊടിയിടയിൽ മിന്നി മാഞ്ഞു പോകുന്ന ഒരുപാടു പിന്നണി പേരുകൾ. അതിലൊന്നാണു വസ്ത്രാലങ്കാരം. വെട്ടിതയ്ച്ചും  കൂട്ടിത്തുന്നിയും സൂചിക്കുത്തുകളേറ്റും പലപ്പോഴും നിറം മങ്ങിപ്പോകുന്നതാണു തയ്യൽക്കാരന്റെ ജീവിതം. പക്ഷേ, പ്രതിഭയും പരിശ്രമവും ചിറകുകളാക്കി മെൽവിൻ ജോയ് എന്ന ചെറുപ്പക്കാരൻ പറക്കാൻ തന്നെ തീരുമാനിച്ചു. മിന്നൽ മുരളി സിനിമയിലൂടെ 2021 ലെ മികച്ച വസ്ത്രാലങ്കാരത്തിനുള്ള സംസ്ഥാന അവാർഡ് നേട്ടം മെൽവിനു സ്വന്തമായി. പ്രതിസന്ധികൾ മറികടന്ന് സ്വപ്നം തൊട്ട മെൽവിന്റെ ജീവിതയാത്ര കേൾക്കാം.

ഒന്നാം വഴിത്തിരിവ്

മെൽവിൻ ജോയ് എന്നാണ് പേര്. ഞാനതു ചുരു മെൽവി ജെ എന്നാക്കിയതാണ്. അമ്മ സിസിലിയുടെ ചേച്ചി മേരിക്കുഞ്ഞ് തയ്യൽക്കാരിയായിരുന്നു. അവരാണു പള്ളിയിൽ എന്റെ തലതൊട്ടമ്മ. പുതിയ തയ്യൽ മെഷീൻ വാങ്ങിയപ്പോൾ വല്യമ്മ പഴയത് എന്റെ വീട്ടിൽ കൊണ്ടുവന്നിട്ടു. അമ്മയ്ക്ക് ഉപകാരമായിക്കോട്ടെന്നു കരുതിയാണ്. ഒരവധിക്കാലത്തായിരുന്നു അത്. പതിവു പോലെ ക്രിക്കറ്റ് കളിയും കഴിഞ്ഞ് വീട്ടിലെത്തുമ്പോൾ ദേ, വീട്ടിൽ പുതിയൊരു താരം. ഒന്നുമറിയില്ലെങ്കിലും ഞാൻ തയ്യൽ മെഷീൻ ചവിട്ടിത്തുടങ്ങി. പിന്നെയൊരിക്കൽ വീട്ടിൽ വന്നപ്പോൾ വല്യമ്മച്ചി ഇതു കണ്ടു. സന്തോഷം സഹിക്കാനാകാതെ എന്നെ തയ്യൽ പഠിപ്പിച്ചു. അങ്ങനെ ഞാൻ തയ്യൽക്കാരനായി.

അന്നത്തെക്കാലത്തു പുതിയ ഉടുപ്പുകളെക്കാൾ ബന്ധത്തിലുള്ള ചേട്ടൻമാരുടെ പാന്റ്സും ജീൻസുമൊക്കെയാ ണ് ഇടാൻ കിട്ടുക. എല്ലാം എന്നേക്കാളും വലുതായിരിക്കും. തയ്യൽ പഠിച്ച് ആദ്യം ചെയ്തത് ഇതെല്ലാം വെട്ടി എന്റെ പാകത്തിൽ തയ്ച്ചെടുക്കലാണ്. അതുകണ്ടു നാട്ടിലുള്ള പലരും അവരുടെ ജീൻസും കൊണ്ട് എന്റെ അടുത്തു വന്നു. നാരോ ഫിറ്റും സ്കിൻ ഫിറ്റും ഹിറ്റായി തുടങ്ങിയ കാലം.

പത്താംക്ലാസ് വരെ വീട്ടിലിരുന്നാണ് ഇതെല്ലാം ചെയ്തിരുന്നത്. ബിസിനസ് ഇങ്ങനെ കയറിവരുന്നതു കണ്ടപ്പോൾ വീടിന്റെ പിന്നിലൊരു ചാർത്തു പിടിച്ച് യെല്ലോ ടൂത്ത്' എന്നൊരു പേരുമിട്ടു തയ്യൽക്കട മുതലാളിയായി.

ഡിസൈനർ ഫ്രം ചേരാനെല്ലൂർ