அரபிக் கடலின் ராணி கொச்சி!

கடவுளின் தேசம் என்று அழைக்கப்படுகிற கேரள நாட்டிற்கு எப்போது வாய்ப்பு கிடைத்தாலும் போய் வரலாம் என்று நினைக்கிற எத்தனையோ ஆயிரம் பேர்களில் ஒருத்தி நான். இன்னும் கூட இவர்கள் சாதிகளை தங்கள் பெயருக்கு பின்னால் சுமந்து கொண்டிருக்கிறார்கள் தான் என்றாலும் இயற்கை அள்ளிக் கொடுத்திருக்கிற பேரழகை இன்னும் கட்டி காத்து வருகிறார்கள் என்பதால் அந்த வகையில் பாராட்டுக்குரியவர்கள் தான்.

- உஷா நேயா

கொச்சி, முன்பு ஒரு முறை பார்த்த இடம் தான். ஆனால் காலம் எல்லாவற்றையும் தலைகீழாக புரட்டிப் போட்டு விடுகிறது தானே? இப்போது அந்த இடங்கள் எப்படி இருக்கின்றன என்று பார்க்க ஆவலாக இருந்தது. கிளம்பிவிட்டோம்.

தென்னிந்தியாவின் மலபார் பிரதேசத்தில் மலபார் கடற்கரையில் அமைந்த பெரிய துறைமுக நகரம் கொச்சி. இது எர்ணாகுளம் மாவட்டத்தில் இருக்கிறது. கொச்சி என்றும் கொச்சின் என்றும் அழைக்கப்படும் இந்த பிரதேசம் கேரளாவின் மக்கள் தொகை அடர்த்தி மிக்க பெருநகரம். அரபிக் கடலின் ராணி என்று அழைக்கப்படும் சொர்க்கமும் இது தான்.

முதலில் நாங்கள் சென்றது போர்ட் கொச்சி கடற்கரை. சுத்தமான வளாகம். அமைதியான சுற்றுப்புறம் என்று முதல் பார்வையிலேயே கண்களை கவர்ந்தது. கடற்கரைக்குச் செல்லும் நடைபாதைகளில் அடர்த்தியான மரங்களும் அவை தரும் நிழல்களும் இடத்தின் அழகை அதிகரிக்கின்றன. பசுமையான கிளைகளும், நீல வானமும் வெண் நுரை ததும்பும் அலைகளும் ஓவியம் போல காட்சியளிக்கின்றன. புத்தாண்டு தின கொண்டாட்டங்களின் போது கொச்சின் கார்வினல் என்ற பிரபலமான நிகழ்ச்சி, இந்த கொச்சின் கடற்கரைகளில் தான் நடத்தப்படுகிறது. கடல் உணவுகளை ரசிப்பதற்காகவே வருகிறது அதற்கான ரசிகர் கூட்டம்.

சரக்கு கப்பல்கள், பயணியர் கப்பல்கள், மரைன் கப்பல்கள் என்று பெரிய பெரிய கப்பல்களை இங்கே சர்வ சாதாரணமாக காண முடிகிறது.

வைப்பின் என்கிற வாட்டர் மெட்ரோ ஸ்டேஷனில் டிக்கெட் வாங்கியபோது மகிழ்ச்சியான திகைப்பு ஏற்பட்டது. ஆமாம் கடலை கடந்து போர்ட் கொச்சி செல்ல வெறும் ஐந்து ரூபாய் மட்டுமே கட்டணம் வசூலிக்கிறார்கள். மிகப்பெரிய கப்பல் போன்ற கார்கள் ஆட்டோக்கள் பேருந்துகள். ஸ்கூட்டர்கள் இவற்றுடன் சேர்ந்து நாங்களும் பயணித்து கடலை கடந்தோம். காம்ரேடுகளின் தேசத்தில் சாமானியனின் வாழ்க்கைக்கு குறைந்தபட்ச பாதுகாப்பு இருப்பதை நேரில் பார்த்தேன்.