சிவன் கோவிலுக்கு சண்டை போடும் தாய்லாந்து - கம்போடியா?

ரஷ்யா-உக்ரைன், இஸ்ரேல்-பாலஸ்தீனம், இந்தியா-பாகிஸ்தான் போர்களைத் தொடர்ந்து தற்போது சர்வதேச அளவில் கவனம் பெற்றிருப்பது தாய்லாந்து-கம்போடியா இடையிலான மோதல்தான்.

- -தவா

சோழர் காலத்தில் கட்டப்பட்ட ஒரு சிவன் கோவில்தான் இந்த இரு நாடுகளின் தீரா பகைக்கு காரணம் என்றால் உங்களால் நம்ப முடிகிறதா?

இந்த இரு நாடுகளும் 817 கிலோ மீட்டர் பரப்பளவிலான எல்லையை பகிர்ந்து கொள்கின்றன. தாய்லாந்தின் சுரின் மாகாணமும், கம்போடியாவின் ஒட்டார் மீஞ்சே மாகாணமும் இந்த எல்லைப் பகுதியை ஒட்டியே அமைந்துள்ளன.

குறிப்பாக, தாய்லாந்தும் கம்போடியாவும் லாவோஸ் நாட்டுடனும் எல்லையை பகிர்ந்து கொள்ளும் எமரால்டு முக்கோணம் என்ற நிலப் பகுதியில் ஏராளமான கோவில்கள் உள்ளன. அதில் ஒன்றுதான் டாங்க்ரெக் என்ற உயரமான மலையில் அமைந்துள்ள ஒரு பழம்பெரும் சிவன் கோவில் பிரே விஹியர்.

தென்கிழக்கு ஆசியாவின் பாரம்பரிய மிக்க ஆன்மிக தலமாக இந்த கோவில் பார்க்கப்படுகிறது. இந்த கோவில்களில் ஏராளமான மர்மங்களும், அமானுஷ்யங்களும் இருப்பதாகவும் சொல்லப்படுகிறது.

இந்த கோவிலின் பின்புலம் குறித்து அறிய வேண்டுமென்றால் நாம் சோழர் காலத்தை நோக்கி பயணிக்க வேண்டும்.

சோழப்பேரரசை கட்டி ஆண்ட ராஜராஜ சோழனின் மகன், இராஜேந்திர சோழன் கடல் கடந்து பல நாடுகளுக்கு படையெடுத்துச் சென்று வெற்றி கண்ட வரலாறு சரித்திரம் சொல்லும்.

அந்த வகையில் தாய்லாந்து, கம்போடியா உள்ளிட்ட பல நாடுகளிலும் சோழனின் கால் தடங்களை பறைசாற்றும் வகையில் உயரமான கோவில்கள், நுட்பமான சிற்ப கம்போடியாவில் வேலைப்பாடுகளுடன் கட்டப்பட்டுள்ளன.

9-ஆம் நூற்றாண்டில் தென் தமிழக பாண்டியர்கள் வழி வந்த சென்சுலா பேரரசு அகற்றப்பட்டு, அங்கு கெமர் ஆட்சி தொடங்கியது. கெமர் பேரரசு சோழ வம்சத்தின் தொடர்புகளை கொண்டது.

11-ஆம் நூற்றாண்டில் கெமர் பேரரசின் பொற்கால ஆட்சியில் அங்கு ஏராளமான கோவில்கள் கட்டப்பட்டன. அதில் ஒன்று தான் 525 மீட்டர் உயரமுள்ள குன்றின் மீது அமைந்துள்ள பிரே விஹியர் சிவன் கோவில். கெமர் பேரரசின் புகழ்பெற்ற அரசனான முதலாம் சூரியவர்மன் காலத்தில் இந்த கோவில் கட்டப்பட்டது. மிகச்சிறந்த கட்டடக்கலைக்கு எடுத்துக்காட்டாக திகழும் இந்த சிவன் கோவில் கெமர்மன்னர்களின் பிரதான சிவன் கோயிலாக விளங்கியது.

கம்போடியாவில் புத்தமதம் கோலோச்சி விட்டாலும் இன்னமும் அங்கு இந்து மத சடங்குகள் பின்பற்றப்பட்டு வருகின்றன. அங்குள்ள மக்கள் தொகையில் 97 சதவீதம் பேர் இந்துக்களாக இருந்து புத்த மதத்தை தழுவியர்கள் என்றே சொல்கிறார்கள்.