ஆட்டம் போடு, பாட்டுப் பாடு!

முதலில் ஒரு காகிதத்தை எடுத்துக் கொள்ளுங்கள். அதில் உங்களுடைய பொழுதுபோக்குகள் என்னென்ன என்று குறித்து வையுங்கள். கட்டுரையை வாசிக்கையில் இன்னும் எதுவும் புதிதாய் தோன்றினால் அவற்றையும் சேருங்கள். கட்டுரையின் முடிவில் அதைப் பற்றிப் பேசுவோம்.

- டாக்டர் அகிலாண்ட பாரதி - டாக்டர் தேவி பிரபா

'அவர் சும்மா இருக்காரு அதான், தோட்டம் வச்சு தண்ணி ஊத்திட்டிருக்காரு' என்ற பேச்சும், 'அவங்க பிள்ளைங்க எல்லாம் செட்டில் ஆகிட்டாங்க. அதான், ஜாலியா வாக்கிங் போறாங்க' என்ற பேச்சும் சாதாரணமாக நம் காதில் அவ்வப்போது விழுபவை தான்.

வயது முதிர்ந்தவர்களுக்கும், பணி ஓய்வடைந்தவடைகளுக்கும், வாழ்க்கையின் பெரிய பொறுப்புகளை நிறைவேற்றியவர்களுக்கும் மட்டுமானதல்ல பொழுது போக்குகள்.

குழந்தைகள் முதற்கொண்டு பெரியவர்கள் வரை, அனைவரையும் அவரவர் அளவில் உற்சாகமாக வளைய வரச் செய்யும் ஆற்றல், பொழுதுபோக்குகளுக்கு, குறிப்பாக பிடித்தமான பொழுதுபோக்குகளுக்கு, நிச்சயம் உண்டு.

புத்தக வாசிப்பு, குழு விளையாட்டு, தனிநபர் விளையாட்டு, பாடுவது, நடனமாடுவது, படம் வரைதல், இசைக்கருவி வாசிப்பது, தையல் வேலை நடிப்பு போன்றவற்றில் நமக்கு விருப்பமானதை நம் பள்ளிப் பருவத்தில் நாம் கண்டறிந்திருப்போம். பழங்கால மற்றும் பல தேசத்து நாணயங்கள் சேகரிப்பது, அஞ்சல் தலைகள் சேகரிப்பது போன்றவற்றையும் பள்ளிப் பருவத்தில் துவங்கியிருப்போம்.