ദുർമരണം ഒഴിയാൻ ചിത്രാപൗർണ്ണമി വ്രതം

അറിവ്

-  പ്രൊഫ. ദേശികം

ആചാരാനുഷ്ഠാനങ്ങളുടെ കാര്യമെടുത്താൽ പൂർവ്വികകാലത്ത് ആചരിച്ചിരുന്ന എത്ര മഹത്തായ ആചരണങ്ങളാണ് ഇന്ന് അന്യം നിന്നുപോയത്. അത്തരം കാലയവനികയിൽ മറഞ്ഞ ആചാരാനുഷ്ഠാനങ്ങൾ പുതുതലമുറയ്ക്ക് പരിചയപ്പെടുത്തേ ണ്ടത് ഒരു ധർമ്മമാണ് എന്ന് വിശ്വസിക്കുന്നയാളാണ് ഞാൻ.അതനുസരിച്ച് ഒരു കാലത്ത് ദ്രാവിഡ ദേശങ്ങളിലാകെ പ്രചുരപ്രചാരമുണ്ടായിരുന്ന ചിത്രാപൗർണ്ണമി എന്ന ആഘോഷത്തെ വായനക്കാർക്ക് പരിചയപ്പെടുത്തുകയാണ് ഇവിടെ.

മേടമാസത്തിലെ പൗർണ്ണമിയെയാണ് ചിത്രാ പൗർണ്ണമി എന്ന് പറയുന്നത്. കേരളം ഒഴികെയുള്ള ദക്ഷിണേന്ത്യന സംസ്ഥാനങ്ങളിൽ ഇപ്പോഴും ഈ ആഘോഷം അതിഗംഭീരമായി നടന്നുവരുന്നു. കൂട്ടുകുടുംബങ്ങളുടെ ശിഥിലീകരണത്തോടെ ചിത്രാപൗർണ്ണമി ആചരിച്ചുപോന്ന കുടുംബങ്ങളിലും അതു നഷ്ടപ്രായമായി.

ചിത്രാപൗർണ്ണമിക്ക് പ്രധാനം ചിത്രഗുപ്തനാണ്. ചിത്രഗുപ്തൻ കാലന്റെ കണക്കപ്പിള്ളയാണ്. ചി ഗുപ്തനെക്കുറിച്ച് തമിഴിൽ എഴുതിയ ചിത്തിര പുത്തിനായിനാർ കതൈ എന്ന പുസ്തകം ചിത്രാപൗർണ്ണമി പുലർകാലം മുതൽ രാത്രിവരെ പാരായണം നടത്തി ഉത്സവം നടത്തിയിരുന്ന കുടുംബ,ഗ്രാമ, ഇതര ക്ഷേത്രങ്ങളിൽ പാരായണം ചെയ്തുപോന്നിരുന്നു. കുടുംബക്കാരും ദേശക്കാരും ഭക്തരും വ്രതമെടുത്ത് ഈ ചിത്രാപൗർണ്ണമി ഉത്സവത്തിലും പൊങ്കാലയിലും സഹകരിച്ചിരുന്നു. ഇപ്പോൾ തിരുവനന്തപുരം പുത്തൻചന്ത ഗാന്ധാരി അമ്മൻ ക്ഷേത്രത്തിലും കേരള തമിഴ്നാട് അതിർത്തിയിലുള്ള മംഗളാദേവി ക്ഷേത്രത്തിലും വടക്കൻ കേരളത്തിൽ ഒറ്റപ്പാലം ഉൾപ്പെടെ ചില അപൂർവ്വ സ്ഥലത്തും തിരുവനന്തപുരം വെള്ളറട കാളിമലയിലും തിരുവനന്തപുരം വെള്ളനാട് വെളിയന്നൂർ അക്കരവിളാകം തിരുനാഗശിവശക്തി ക്ഷേത്രത്തിലും തമിഴ്നാട്ടിൽ അംബാസമുദ്രത്തിനടുത്തുള്ള പാപനാശത്തും കാഞ്ചി ചിത്രഗുപ്തക്ഷേത്രത്തിലും വിഴുപ്പുറം തിരുവക്കര വക്രകാളിക്ഷേത്രത്തിലും വിഴുപ്പുറം ദേശത്ത് മറ്റനേകം ക്ഷേത്രത്തിലും അഗസ്ത്യഗിരിയുടെ മുകളിലുള്ള കാരയാർ ക്ഷേത്രത്തിലും മറ്റും ചിത്രാപൗർണ്ണമി ചിത്രഗുപ്തന്റേതായി ആഘോഷിക്കുന്നു. ഇതേ ദിവസം മധുരമീനാക്ഷി ക്ഷേത്രത്തിലും ഗംഭീരമായ ആഘോഷമാണ്.