அரசமைப்புச் சட்டம் 51A(h) பிரிவுக்கு முதலிடம் கொடுத்து அரசுகள் செயல்படுக!

தந்தை பெரியார் கண்ட சுயமரியாதை இயக்கத்தின் நூற்றாண்டு விழாவில், சுயமரியாதை உலகைப் படைக்க அர்ப்பணித்துக் கொண்டு செயல்படுவது என்றும், கழகப் படிப்பகங்களை சிறப்பாக செயல்பட வைப்பது உள்பட திராவிடர் கழக இளைஞரணி மாநிலக் கலந்துரையாடலில் 7 தீர்மானங்கள் நிறைவேற்றப்பட்டன.

- 

சென்னை பெரியார் திடலில் நடைபெற்ற திராவிடர் கழக மாநில இளைஞரணிக் கலந்துரையாடல் கூட்டத்தில் நிறைவேற்றப்பட்ட தீர்மானங்கள் வருமாறு:

11.05.2025 அன்று தமிழர் தலைவர் ஆசிரியர் அவர்கள் தலைமையில் சென்னை பெரியார் திடலில் நடைபெற்ற திராவிடர் கழக இளைஞரணி மாநிலக் கலந்துரையாடல் கூட்டத்தில் முன்மொழியப்படும் தீர்மானங்கள்:

முன்மொழிந்தவர்: தா.தம்பி பிரபாகரன் (மாநில துணைச்செயலாளர், திராவிடர்கழக இளைஞரணி தீர்மானம் எண் 1:

கழகத் தலைவரின் ஆணைகள் ஏற்று களப் பணியாற்ற உறுதியேற்போம்!

ஓர் இனத்திற்கே சுயமரியாதையை மீட்டுத் தந்த சூரியனாம் தந்தை பெரியார் அவர்கள்தான், 'இனமானம் காக்கும் பணியில் தன்மானத்தைப் பற்றிக் கவலைப்பட முடியாது' என்னும் பாலபாடத்தை இவ்வியக்கத்திற்குக் கற்றுக் கொடுத்திருக்கிறார்கள். "பிச்சை புகினும் பிரச்சாரம் நன்றே” என்று தமிழர் தலைவர் நடத்திய பாடத்தையும் பிழையறப் பயின்றதால் தான் திராவிட இனத்தின் வாளும் கேடயமுமாக திராவிடர் கழகம் செயல்பட முடிகிறது. போர்க் களத்தில் நிற்கும் போது, படைத் தளபதியின் கட்டளை எதுவென்றாலும், அதை இம்மியளவும் பிசகாமல் செயல்படுத்த வேண்டும் என்னும் இராணுவக் கட்டுப்பாட்டுடன் தமிழர் தலைவரால் வளர்க்கப்பட்டது திராவிடர் கழக இளைஞரணி. அதனை இத் தலைமுறை இளைஞர்களும், மாணவர்களும் அப்படியே பின்பற்றுவது இயக்கத்தின் செயல்பாட்டுக்கும், இனத்தின் நலனுக்கும் மிக முக்கியமானதாகும். சுயமரியாதை மிகு உலகம் படைக்க, கழகத் தலைவர் வழங்கும் ஆணைகள் எதுவாயினும் அதே கட்டுப்பாட்டு உணர்வுடன் களப் பணியாற்ற திராவிடர் கழக இளைஞரணி எப்போதும் அணியமாக இருக்கிறோம் என்று இக் கூட்டம் மீண்டும் ஒரு முறை உறுதியேற்கிறது.

முன்மொழிந்தவர்: முனைவர் வே.இராஜவேல் தீர்மானம் எண் 2:

'ஜாதிவாரிக் கணக்கெடுப்பு ஏன்? எதற்காக?'