சிறகு விரிப்போம், உறவை வளர்ப்போம்

ஒவ்வொரு வாரமும் சிங்கப்பூரில் இருக்கும் குறிப்பிட்ட சில திறந்தவெளிகளில் இந்தியக் குடும்பங்கள் சில ஒன்றுகூடி ஒரு தனித்துவமான பொழுதுபோக்கில் ஈடுபட்டு வருகின்றன.

- அனுஷா செல்வமணி

காண்போரைக் கவர்ந்திழுக் கும்படியான வண்ணமிகு சிறகுகளுடன் கூடிய மக்காவ் கிளிகளை வானில் பறக்கவிட்டு அவர்கள் இன்பமடைகின்றனர். வண்ணமயமான நீண்ட வால் கொண்ட மக்காவ் கிளிகள், பஞ்சவர்ணக் கிளிகள் என்றும் அழைக்கப்படுகின்றன.

பல ஆண்டுகளாக இந்தப் பொழுதுபோக்கில் ஈடுபட்டு வரும் அக்குடும்பங்கள், அண்மையில் ‘விங்டு வாரியர்ஸ்' எனும் ஒரு குழுவை உருவாக்கி இந்தியக் குடும்பங்களை அதில் ஈடுபட ஊக்குவித்து வருகின்றன. மிஷெல் யோகேஸ்வரி, 37 - தனபாலன், 43, இணையர் ஒரு பிள்ளையை வளர்ப்பதுபோல தங்களின் இரு மக்காவ் கிளிகளைக் கண்ணும் கருத்துமாக வளர்த்துவருவதோடு, அவற்றைப் பறக்க விடுவதிலும் முழுமூச்சாக ஈடுபட்டு வருகின்றனர்.

ஸ்டோர்மி, தண்டர் எனும் அந்த இரு மக்காவ் கிளிகளும் இவர்களின் வாழ்வில் மட்டுமின்றி அவர்களின் நான்கு வயது மகள் பீட்ரைஸ் ஃபோக் இஷானா வாழ்விலும் பின்னிப் பிணைந்துள்ளன.