இரை தேடும் பறவைகள்

பார்வதியின் அழைப்பு அசரீரியாக “மஞ்சு மஞ்சு” பலமுறை கூப்பிட்டும் திரும்பல என்ன யோசனை எங்கயோ எதையோ வெறித்துப் பார்த்தவளாய் மஞ்சுளா தான் பெற்ற இரண்டு பெண் பிள்ளைகளுடன் நின்றுக் கொண்டிருந்தார்.

- றொசில்டா அன்டன்

பார்வதி மஞ்சுளாவின் பக்கத்து வீட்டில் வசிப்பவர், ஓய்வூதியம் பெறுகின்றவர், பிள்ளைகள் மண முடித்து நல்ல நிலையில் வெவ்வேறு இடத்தில் வசிப்பதால் தன் பூர்வீகவீட்டிலேயேவசிப்பவர். உடல்நலக்குறைவால் எங்கும் செல்வதில்லை வீட்டிலேயே தன்னை சிறைப்படுத்திக்கொண்டார். மஞ்சுளா பார்வதிக்கு தேவையான வீட்டு வேலைகளை செய்து அன்றன்றைக்கு பார்வதி வீட்டில் கிடைக்கும் உணவைக் கொண்டே பிள்ளைகளின் பசியைபோக்கினாள்.

ஊதாரி கணவனால் மஞ்சுளா மட்டுமன்றி, அவளது பிள்ளைகளும் பாதிக்கப்பட்டனர். நாள் தோறும் குடிப்பான், பல்வேறு சித்திரவதைகள். மஞ்சுளா கடைசியாக விவாகரத்து செய்ய முடிவு செய்தாள். "பார்வதி அக்கா இன்று வழக்கு .. இது முடிவுக்கு வந்தால் சரி நான் ஏதும் முடிவு எடுக்கலாம். மகள்களை ஆசிரமத்தில் விட்டுட்டு வெளிநாட்டுக்கு வேலைக்கு போகலாம் என்று நினைக்கிறேன்".

“சரி நீ வழக்குக்குபோய் வா மூத்தவள் இளையவளை பார்த்துக்கொள்ளட்டும்” என்றாள் பார்வதி.

மஞ்சுளாவின் மூத்த மகளுக்கு வயது பதினொன்று மற்ற மகளுக்கு ஆறு வயது பெண் பிள்ளைகள் என்பதால் பார்வதிக்கும் உதவியாகபோய் விட்டது. பசி போக்குவதற்கே பெரும் பாடுபடும் மஞ்சுளா பிள்ளைகளின் கல்வித் தேவைக்கு, வாழ்வாதாரத்திற்கு பலரிடம் கையேந்தி விட்டாள். பல இடங்களில் அவள் அவமானப்பட்டாள். கணவன் கடன்பட்டு குடிப்பவன் என்பதால் அவளுக்கு போகுமிடமெல்லாம் துன்பம் தொடர்கதையானது. வழக்கும் முடிவு கண்டது. மூத்தவள் பெரியவளாகி விட்ட செய்தி மஞ்சுளாக்கு மகிழ்ச்சியாக இருந்தாலும் அதிர்ச்சியளித்தது.