'n KOLHOU vir dié OSIES gholfspan

Oosskool se o/13-gholfspan het tydens die skoolvakansie herinneringe vir 'n leeftyd geskep toe hulle die Super 12-gholftoernooi op die wêreldbekende Gary Player Gholfbaan by Sun City gewen het.

- Maretha Swanepoel

Die span, bestaande uit Zach Allison, Nathan Faver, NJ Pretorius en Liano Viviers, het saam met 110 ander spelers van 23 skole landwyd meegeding. Oosskool het uiteindelik as wenners van die IPS-puntekompetisie uit die stryd getree - 'n formaat waarin spelers op hul eie voorgee speel.

Een van die vele hoogtepunte van die toernooi was toe die jong Zach, tans in gr. 5, die eerste plek in die IPS-kategorie behaal het. "Ek het dit glad nie verwag nie, dit was 'n groot verrassing. My voorgee is baie hoog en dit het my gehelp om makliker punte aan te teken," het hy vertel.

In die Zero-kompetisie het Oosskool 12de geëindig, maar in die Limpopo-liga (ook 'n Zero-formaat) het die A-span eerste geëindig in die seuns A-afdeling, die B-span tweede in die B-afdeling, en die meisiespan het 'n indrukwekkende vierde plek behaal - in hul heel eerste deelname.