தனி மனித உரிமைகள்: அனைத்துத் துறை அதிகாரிகளும் உறுதிப்படுத்த உத்தரவு

ஒருவரின் தனிமனித சுதந்திரம், அடிப்படை உரிமைகள் யாராலும், எந்த நிலையிலும் மீறப்படவில்லை என்பதை மாநிலத்தின் அனைத்துத் துறை அதிகாரிகளும் உறுதிப்படுத்த வேண்டும் என சென்னை உயர்நீதிமன்ற மதுரை அமர்வு செவ்வாய்க்கிழமை உத்தரவிட்டது.

- 

மதுரை, ஆக. 5:

தென்காசி மாவட்டம், தலைவன்கோட்டையில் சிலரை ஜாதியைக் கூறி அவதூறாகப் பேசி, மிரட்டல் விடுத்ததாக திருமலைச்சாமி என்பவர் மீது புளியங்குடி போலீஸார் வழக்குப் பதிவு செய்தனர்.

இந்த வழக்கில் அவருக்கு விசாரணை நீதிமன்றம் ஓராண்டு சிறைத் தண்டனையும், ஆயிரம் ரூபாய் அபராதமும் விதித்தது. இதை எதிர்த்து திருமலைச்சாமி சென்னை உயர்நீதிமன்ற மதுரை அமர்வில் மனு தாக்கல் செய்தார்.

இந்த மனுவை ஏற்கெனவே விசாரித்த உயர்நீதிமன்ற நீதிபதி ஆர். என். மஞ்சுளா, தண்டனையை நிறுத்திவைத்து உத்தரவிட்டார்.

இந்த விசாரணையின் போது, புகார் தாரர் முனியம்மாள் மற்ற சமூக மக்கள் வசிக்கும் பகுதியிலுள்ள குடிநீர்க் குழாயிலிருந்து, தண்ணீர் பெறுவது கடினமாக உள்ளதாக நீதிபதியிடம் கூறியிருந்தார்.

இந்த நிலையில், தலைவன்கோட்டை பகுதியில் போதிய அளவு குடிநீர்க் குழாய்கள் பொருத்தி அதுதொடர்பான அறிக்கையை தென்காசி மாவட்ட ஆட்சியர் தாக்கல் செய்ய நீதிமன்றம் உத்தரவு பிறப்பித்தது.