புதுச்சேரியில் காற்று மாசை குறைக்க மின்சாரப் பேருந்துகள்!

புதுச்சேரியில் காற்று மாசைக் கட்டுப்படுத்த உதவும் வகையில் மின்சாரப் பேருந்துகளை அதிகரிக்கத் திட்டமிடப்பட்டுள்ளது.

- வ.ஜெயபாண்டி

புதுச்சேரி ஜூன் 1: அதன்படி, 2030-ஆம் ஆண்டுக்குள் 50 சதவீத பேருந்துகளை மின்சார வாகனங்களாக்கவும் நடவடிக்கை மேற்கொள்ளப்பட்டுள்ளது.

புதுச்சேரியில் கடந்த பல ஆண்டுகளாக சுமார் 11.50 லட்சம் வாகனங்கள் பதிவு செய்யப்பட்டுள்ளன.

அவற்றில் சுமார் 2 லட்சம் வாகனங்கள் நான்கு சக்கர வாகனங்களாகவும், சுமார் 4.50 லட்சம் வாகனங்கள் இரு சக்கர வாகனங்களாகவும் இருப்பதாகப் போக்குவரத்துத் துறையினர் தெரிவித்தனர்.

புதுச்சேரி சாலைப் போக்குவரத்துக் கழகத்துக்குச் சொந்தமாக 124 பேருந்துகள் வாங்கப்பட்டன. அதில் 105 பேருந்துகள் தற்போது இயங்கி வருகின்றன.

அரசுத் துறைக்கு 1,060 வாகனங்கள் வாங்கப்பட்டுள்ளன.

அரசு வாகனங்கள் அதிகபட்சம் 15 ஆண்டுகள் இயக்கப்படலாம். அதற்குப் பிறகு, அவை சாலையில் இயக்கப்படக் கூடாது என்ற விதி உள்ளது. அதன்படி, பெரும்பாலான வாகனங்கள் இயக்கப்படக் கூடாது என்ற நிலையில் இருந்தாலும், அவற்றில் 465 வாகனங்களே தற்போது இயக்கப்படாமல் ஏலம் விடப்பட்டுள்ளன.

தேசிய அளவில் காலாவதியான வாகனங்களை வாங்க மத்திய அரசு உரிமம் பெற்ற வாகன இரும்புப் பொருள்கள் பெறும் பதிவு மையம் (ஆர்விஎஸ்எப்) தொடங்க அனுமதிகள் வழங்கப்பட்டுள்ளன.