உங்களுடன் ஸ்டாலின் திட்ட முகாம்: மகளிர் உரிமைத் தொகைக்கு விண்ணப்பிக்க ஆர்வம்

'உங்களுடன் ஸ்டாலின்' திட்ட முகாமில், மகளிர் உரிமைத் தொகைக்கான விண்ணப்பங்களை பதிவு செய்வதற்கு பெண்கள் ஆர்வம் காட்டினர்.

- 

திண்டுக்கல்/ ஒட்டன்சத்திரம்/ நிலக்கோட்டை/பழனி, ஜூலை 15:

'உங்களுடன் ஸ்டாலின்' திட்ட முகாம், திண்டுக்கல் மாவட்டத்தில் திண்டுக்கல், முள்ளிப்பாடி, ஆத்தூர், வேடசந்தூர், ஒட்டன்சத்திரம், நெய்க்காரப்பட்டி ஆகிய 6 இடங்களில் செவ்வாய்க்கிழமை நடைபெற்றது. திண்டுக்கல் மாநகராட்சிக்குள்பட்ட 1, 2-ஆவது வார்டுகளுக்கான முகாமை ஊரக வளர்ச்சித் துறை அமைச்சர் இ.பெரியசாமி தொடங்கிவைத்தார்.

அப்போது அவர் கூறியதாவது:

அரசின் திட்டங்கள் வீடு தேடிச் சென்றடையச் செய்யும் வகையில், உங்களுடன் ஸ்டாலின் திட்ட முகாம் தொடங்கப்பட்டது. இந்த முகாம்களில் பெறப்படும் மனுக்கள் மீது 45 நாள்களில் தீர்வு காணப்படும். மகளிர் உரிமைத் தொகைத் திட்டத்தில் மாதம் ரூ.1000 வழங்கப்பட்டு வருகிறது. இந்தத் திட்டத்தில் தகுதியான நபர்கள் விடுபட்டிருந்தால், அவர்களும் பயன்பெறுவதற்காக நடவடிக்கை மேற்கொள்ளப்பட்டு வருகிறது. திண்டுக்கல் மாவட்டத்தைப் பொருத்தவரை 4 லட்சம் பெண்கள் மகளிர் உரிமைத் தொகைத் திட்டத்தில் பயனடைந்து வருகின்றனர் என்றார் அவர்.

இந்த நிகழ்ச்சியில், மாவட்ட ஆட்சியர் செ.சரவணன், மேயர் இளமதி, மாநகராட்சி ஆணையர் ம.செந்தில்முருகன், திமுக பொருளாளர் சரவணன், திமுக தலைமை பொதுக்குழு உறுப்பினர் அக்பர் உள்ளிட்ட பலர் கலந்து கொண்டனர்.