மாநிலங்களவைத் தேர்தல் வேட்பு மனு நிராகரிப்பு: மீனாட்சி நடராஜனின் வழக்கு தள்ளுபடி

மாநிலங்களவைத் தேர்தலுக்கான வேட்பு மனு நிராகரிக்கப்பட்டதை எதிர்த்து காங்கிரஸ் மூத்த தலைவர் மீனாட்சி நடராஜன் தாக்கல் செய்த வழக்கை உச்சநீதிமன்றம் வெள்ளிக்கிழமை தள்ளுபடி செய்தது.

- 

மத்திய பிரதேச மாநிலத்தில் இருந்து மாநிலங்களவைக்கு மூன்று எம்.பி.க்களை தேர்வு செய்வதற்கான தேர்தலில் அவர் மனு தாக்கல் செய்திருந்தார். ஆனால் அவர் மீது தெலங்கானா நீதிமன்றத்தில் இருக்கும் கிரிமினல் வழக்கு விவரத்தை வேட்புமனுவில் (பிரமாணப் பத்திரத்தில்) குறிப்பிடாமல் மறைத்துவிட்டதாகக் கூறி, மனுவை தேர்தல் அதிகாரி தள்ளுபடி செய்தார். இதை எதிர்த்து, உச்சநீதிமன்றத்தில் மீனாட்சி நடராஜன் மனு தாக்கல் செய்திருந்தார்.

இந்த மனு, உச்சநீதிமன்றத்தில் நீதிபதிகள் பிரசாந்த் குமார் மிஸ்ரா, அதுல் எஸ். சந்துர்கர் அமர்வில் வெள்ளிக்கிழமை விசாரணைக்கு வந்தது. அப்போது மீனாட்சி நடராஜன் சார்பில் மூத்த வழக்குரைஞர் அபிஷேக் சிங்வி ஆஜராகி வாதிட்டார். அப்போது அவர் கூறியதாவது:

இந்த விவகாரத்தில் தேர்தல் அதிகாரி முழுவதும் தன்னிச்சையாகச் செயல்பட்டுள்ளார். மக்கள் பிரதிநிதித்துவச் சட்டத்தின் 33-ஏ பிரிவானது, கிரிமினல் வழக்குகளில் குற்றச்சாட்டுகளை விசாரணை நீதிமன்றம் பதிவு செய்தால் மட்டுமே, அந்த வழக்கு குறித்து வேட்பு மனுவில் (வேட்பாளர்) குறிப்பிடுவது அவசியம் எனத் தெரிவிக்கப்பட்டுள்ளது. பிஎன்எஸ் சட்டத்தின் 223-ஆவது பிரிவில், தனி நபர் புகார் மீது முடிவெடுக்கும் முன்பு, அதில் குற்றச்சாட்டுக்கு ஆளாகியுள்ள நபருக்கு நோட்டீஸ் அனுப்பப்பட வேண்டும் எனக் குறிப்பிட்டுள்ளது.