கிருஷ்ணகிரி மாவட்டத்தில் 66,326 மாணவர்களுக்கு விரிவுபடுத்தப்பட்ட காலை உணவுத் திட்டம்

கிருஷ்ணகிரி மாவட்டத்தில் அரசு, அரசு உதவி பெறும் பள்ளிகள் என விரிவுபடுத்தப்பட்ட காலை உணவுத் திட்டத்தின் மூலம் 66,326 மாணவ, மாணவிகள் பயனடைந்துள்ளதாக ஆட்சியர் ச.தினேஷ்குமார் தெரிவித்தார்.

- 

கிருஷ்ணகிரி/ ஒசூர், ஆக.26:

கிருஷ்ணகிரி மாவட்டத்தில் நகரங்களில் உள்ள அரசு உதவி பெறும் பள்ளிகளில் 1 முதல் 5ஆம் வகுப்பு வரை பயிலும் மாணவ, மாணவிகளுக்கு காலை உணவுத் திட்டத்தை தமிழக முதல்வர் மு.க.ஸ்டாலின், காணொலி காட்சி மூலம் செவ்வாய்க்கிழமை தொடங்கிவைத்தார்.

தொடர்ந்து கிருஷ்ணகிரி மாவட்டத்தில் கிருஷ்ணகிரி, ஒசூர், காவேரிப்பட்டணம், பர்கூர்,கெலமங்கலம் உள்ளிட்ட பகுதிகளில் அரசு உதவிபெறும் 6 பள்ளிகளிலும் காலை உணவுத் திட்டம் தொடங்கப்பட்டது.

கிருஷ்ணகிரி நகராட்சி புனித அன்னாள் அரசு உதவிபெறும் பெண்கள் தொடக்கப் பள்ளியில் காலை உணவுத் திட்டத்தை கிருஷ்ணகிரி மாவட்ட ஆட்சியர் தொடங்கிவைத்து பேசியதாவது:

கிருஷ்ணகிரி மாவட்டத்தில் 1,387 அரசு பள்ளிகளில் 1 முதல் 5-ஆம் வகுப்பு வரை பயிலும் 63,167 மாணவ, மாணவிகள், ஊரக பகுதிகளில் செயல்படும் அரசு உதவிபெறும் 8 பள்ளிகளில் 1,017 மாணவ, மாணவிகள் என 64,184 பேர் பயன்பெற்றனர்.