தமிழகத்தில் எங்களுடைய ஆட்சி இருக்கிறவரை மதவெறி ஆட்டத்துக்கு இங்கு இடமில்லை

மக்கள் உங்களை ஓட்டுகளால் விரட்டி அடிப்பார்கள். கள்ளக்குறிச்சியில் முதல்வர் மு.க.ஸ்டாலின் பரபரப்பு பேச்சு

- 

தமிழ் நாட்டில் ஸ்டாலின் இருக்கும் வரை, திமுக ஆட்சி இருக்கும் வரை மதவெறி ஆட்டத்துக்கு இடம் கிடையாது. ஒற்றுமையாக வாழுகின்ற தமிழ்நாட்டு மக்களிடம் மதவெறியை தூண்ட முடியாது. தமிழ்நாட்டு மக்கள் உங்களை ஓட்டுகளால் விரட்டி அடிப்பார்கள் என்று முதல்வர் மு.க.ஸ்டாலின் திட்டவட்டமாக தெரிவித்து உள்ளார்.

கள்ளக்குறிச்சியில் நேற்று நடந்த அரசு விழாவில் முதல்வர் மு.க.ஸ்டாலின் பேசியதாவது: திராவிட மாடல் அரசின் சாதனைகளுக்கு மகுடமாக, 2026 தேர்தலில், மக்கள் அளிக்கும் தீர்ப்புதான், உங்களுக்கான (அதிமுக, பாஜ) ரியாலிட்டி ‘செக்’-ஆக இருக்கும். தமிழ்நாட்டின் சாதனைகள் வளர்ச்சி நிறைந்த ஒரு இந்தியா என்றால், பாஜ ஆளும் மாநிலங்களில் வேறு ஒரு இந்தியா இருக்கிறது. வறுமை, மதவன்முறை, கும்பல் படுகொலைகள், கல்வியைக் கெடுக்கும் முயற்சிகள், வேலை வாய்ப்பின்மை... இதுதான் பாஜவின் இந்தியா. கிறிஸ்துமஸ் அன்றைக்குக்கூட மாற்றுத் திறனாளிகளையும், குழந்தைகளையும் தாக்குகின்ற மோசமான சூழலை பாஜ அரசு உருவாக்கி இருக்கிறது. இந்த மாடலைத்தான் தமிழ்நாட்டிலும் கொண்டு வரவேண்டும் என்று பார்க்கிறார்கள்.