RAYMONDO SING NOU MET ENGELE

DIE Bredasdorp-gemeenskap is in rou gedompel ná die tragiese dood van die plaaslike rapper Raymondo August, beter bekend as Madray. August het Sondagoggend in die Worcester-hospitaal aan sy wonde beswyk nadat hy glo met 'n mes gesteek is.

- 

LIEFDE: Raymundo en Nadia sou hulle tweede huweliksherdenking vier.

Die 33-jarige August, wat as die eerste Afrikaanse rymkletser van Bredasdorp bekend gestaan het, is Saterdagaand in 'n onderonsie met 'n vriend glo gesteek.

Volgens sy vrou, Nadia (28), was August passievol oor musiek en het hy baie jongmense op die dorp geïnspireer om self musiek aan te leer.

“Alles het begin in sy slaapkamer in sy ma se huis,” vertel sy. “Hy het klein begin, maar het groot drome gehad.”

Sy beskryf die skokkende oomblik toe sy gehoor het wat gebeur het: “Ek was by die huis toe my suster kom sê ons moet hospitaal toe kom want Raymondo is gesteek. Ek het baie groot geskrik.

“By die hospitaal het hy nog grappe gemaak, maar hy was in baie pyn. Hy was 'n vegter tot aan die einde.”

Die egpaar sou vanjaar hulle tweede huweliksherdenking gevier het en het planne gemaak om volgende jaar 'n baba te hê.