'DIS SOVER VIR ONS NOG ÁL UITWEG'

Inwoners sonder heenkome plak en soek geriewe

- BASIL DAVIDS

Talle mense hier wat die afgelope 20 jaar vir huise wag, het nou die reg in hulle eie hande geneem.

Die ontstoke inwoners het doodeenvoudig op Langeberg-munisipaliteitsgrond kom plak.

Van die oudste inwoners, die 70-jarige Sophia en haar man, Petrus Lekay (59), was vandeesweek op Son se besoek in die plakkerskamp in die Môreson-gebied.

En die egpaar was toe besig om kos in 'n klein driebeenpotjie aanmekaar te slaan.

"Ek en Petrus het destyds op 'n plaas buite Ashton gebly toe ons die plaas moes verlaat omdat daai plaasboer sy plaas verkoop het," het Sophia gesê.

Volgens haar het hulle sowat 15 jaar gelede van die grond in die Robertson-area waar mense reeds begin plak het, verneem.

"Onse familie wat nou 'n ent vanaf ons bly, het toe aanbeveel dat ons ook daar 'n huisie vir ons kan kom opsit," het Petrus gesê.