KOEËLS EIS GROOT GEES

DAAR hang 'n donker wolk oor die gemeenskap van Happy Valley in Blackheath nadat een van die hoekstene van dié gemeenskap die afgelope naweek doodgeskiet is.

- CHRISLYNN SIAS-LOUW

Jullie de Bruin (56) se lewelose liggaam is Sondagoggend in haar kombuis aangetref nadat sy vermoedelik laat Saterdagaand deur die venster doodgeskiet is. Sy is in die skouer en nek geskiet.

De Bruin se dood kom slegs twee weke nadat drie mans koelbloedig in Happy Valley afgemaai is terwyl hulle op 'n winkelstoep gestaan het. Die gemeenskap het nog skaars van dié voorval herstel, toe val een van hulle grootste gemeenskapsleiers.

Gustav Smith, De Bruin se broer, vertel vandeesweek aan Son sy hart is in stukke oor wat met sy suster gebeur het - veral die manier waarop sy gesterf het.

Hy vertel: "Jullie was 'n mense-mens en bitter lief vir haar gemeenskap. Sy was baie lief om mense te help en jy kan enige iemand in Happy Valley vra oor Jullie en hulle sal jou sê presies wie en wat sy was.

"Die vermisting is reeds groot en dis nog nie eens lank nie. As dit vir my so voel, wil ek nie weet hoe dit vir die community voel nie."