BLINKOOG-KIND STERF WREDE DOOD

Sestien jaar lank het Ivan Mentoor sy vrou se kind soos sy eie grootgemaak en was die twee onafskeidbaar.

- DARRYL RUITERS

Nou staan die einste man wat Kaylee Maarman (18) vir jare as 'n pa gesien het, in die Clanwilliam-landdroshof tereg vir die moord op haar.

Die gr. 11-meisie se lewe is Vrydagaand kortgeknip ná haar ma, Nicolene, en Ivan glo 'n lelike uitval gehad het.

Die tragiese voorval het op die hoek van Bronze-laan, skaars 100 meter van haar ouerhuis af, plaasgevind.

Kaylee se mammie vertel dat Ivan Vrydagaand voor die voorval by haar was en haar gevra het om hulle weer 'n tweede kans te gee.

Sy het hom egter mooi laat verstaan dit dinge tussen hulle oor en verby is.

Volgens Nicolene kon Ivan nooit oor hulle egskeiding kom nie.

Op die noodlottige aand het hy haar glo ook die dood voor die oë gesweer omdat sy nie hulle verhouding nog 'n kans wou gee nie.