Anthea en meneer Cloete laat Darren twee keer dink

Darren weet nou nie of hy verlig moet wees nie.

- 

Soos hy vir Anthea opgesom het, ken sy van aanhou. Maar aan die ander kant geniet hy nogal haar aandag en besorgdheid.

"E-Ek moet nou gaan. Meneer Cloete hou nie daarvan dat ons laat is vir sy klas nie," maak hy vinnig verskoning.

"Hoe gaan jy jou blouoog aan hom verduidelik?" vra Anthea.

"E-Ek gaan sê d-dat ek teen die saal se deur vasgeloop het," skerm hy en voel-voel weer aan sy linker-oog.

"Daai is die oudste ekskuus in die boek," spotlag Anthea, plaas skielik 'n soentjie op sy wang, draai haar om en stap na haar klaskamer.

Darren voel asof 'n hele kolonie skoenlappers nou in sy maag rondfladder. Hy het dit nie verwag nie.

Hy kyk Anthea 'n rukkie agterna en daar kom so 'n sterk gevoel by hom op om agter haar aan te hardloop en haar teen sy bors vas te druk.

Maar hy skud onmiddellik die lawwe gedagte uit sy kop en stap in die teenoorgestelde rigting na sy klaskamer.