'DIS ONS KIND WAT DAAR LÊ'

"ONS het die skote gehoor, maar nie geweet dit is ons kleinkind wat geskiet is nie.

- 

Só sê Bernard Wildeman (51) van Wallacedene, Kraaifontein, nadat sy kleinkind Esmien Francke (12) Dinsdagaand deur 'n dwaalkoeël in die kop getref is.

Die voorval het omstreeks 18:30 in Mti-straat plaasgevind toe bendelede glo begin losbrand.

Dit was nadat hulle op 'n man geskiet het wat deur 'n groep kinders wat in die pad gespeel het, gehardloop het.

"Alles het so vinnig gebeur. Ek en my vrou was by my dogter Cindy se huis, net af in die pad.

"Ons het die skote gehoor, min wetend dat dit ons kleinkind is wat doodgeskiet word,” vertel die oupa hartseer.

“Iemand het geskree: ‘Daar lê 'n kind!’ Toe ons op die toneel kom, sien ek maar dis ons kind wat daar lê.”

Volgens hom het Esmien en haar vriende in die pad gespeel soos hulle maar elke dag doen.

“Toe die skote begin klap, het sy (Esmien) vir hulle in die yard gestoot en sy was die laaste een buite en dis toe die koeël haar tref.”

Stukkend

Haar neef (20) is ook twee keer deur sy bene geskiet toe hy voor in die yard gesit het tydens die voorval. En die neighbour se kind (8) is ook in haar heup getref

“Ons is stukkend. Ek het nie woorde nie. Sy was die enigste kleinkind wat by ons gebly het,” sê hy.