GLO GESKIET OOR SWEETS

'N STRYERY oor suikerlekkers het Sondagmiddag groot marakkas in Pine Valley in Wolseley veroorsaak toe die eienaar van 'n spaza shop 'n gun uitgepluk en soos 'n willewragtig begin skiet het.

- CHRISLYNN SIAS-LOUW

Twee mense is in die skietvoorval gewond - 'n 48-jarige man en vierjarige kind.

Daarna is die winkel geplunder en 'n voertuig aan die brand gesteek toe gemeenskapslede oproerig geraak het ná die voorval.

Franco Lee (48), een van die slagoffers, sê alles het begin toe sy vrou na die betrokke winkel gegaan het om suikerlekkers te koop.

"Sy het R10 se lekkers gekoop en terwyl sy die lekkers afgetel en by sewe gekom het, het die Somaliër van agter die toonbank die blik gegryp en gesê 'F*k jou'. My vrou het dit net so gelos en vir my kom sê."

Lee is toe op sy beurt na die winkel om te gaan vasstel wat die probleem is en hoekom die man so met sy vrou gepraat het. Toe hulle by die winkel kom, was die betrokke man nie meer agter die toonbank nie, maar omdat Lee die winkel soos die palm van sy hand ken, het hy presies geweet waar om na die man te soek.