Die slinkse Angela het vir Edison net waar sy hom wil hê

E DISON Fourie het die vorige aand by Angela Grootboom oorgeslaap nadat sy - sonder sy medewete - 'n aanval op haarself in haar huis gestage het.

- 

Die next oggend word hy wakker van 'n aanhoudende gehamer aan die voordeur. Toe hy wakker word, is hy 'n wyle gedisoriënteer omdat hy nie onmiddellik weet waar hy is nie. Hy onthou die aanval op Angela so skramsweg.

Nadat Edison 'n paar keer Angela se naam uitgeroep en nie 'n respons gekry het nie, besluit hy om op te staan en self die deur te gaan oopsluit. Hy merk die huis is netjies opgeruim. 'n Mens sou nooit sê dit was die vorige aand omgedolwe nie. Selfs die gebreekte ruit is vervang. Daar is egter geen teken van Angela nie.

Toe Edison die deur oopmaak, word hy begroet deur Stella van Niekerk - die grootste skinderbek in Dawidshoogte. Sy herken Edison onmiddellik.

Dis nie wat jy dink nie

"Slaan my dood met 'n pap snoek. Broer Fourie? Wat maak jy hier? "Waar's Angela? Het ek dan iets gemis? Kyk, ek ken almal se sake op dié dorp, maar dié een het ek beslis gemis. Broer, skaam jou. Hoe lank gaan dit nou al aan?" val Stella weg.

Nog voordat Edison kan explain, verduidelik Stella dat Angela haar vroeër die oggend gebel het om 'n pakkie by haar (Angela) te kom optel.

"Dit lyk nie of sy hier is nie. Ek het haar nog nie vanoggend gesien nie,” sê Edison wat nog duidelik deur die slaap is.

"Okay... Nee, dis dan reg so. Ek sal later weer 'n draai kom maak. En, broer, moenie worry nie, your secret is safe with me. Ek praat nie uit nie," fluister Stella terwyl sy vir Edison knipoog.

"Geheim? Watse geheim? Nee, nee, nee, dis nie wat jy dink nie. Ek ... 'm... Angela ... " sukkel Edison om te verduidelik.

"Ooh, hoor nou net vir broer Fourie. Amper soos oppie TV 'dis nie wat jy dink nie', meanwhile back at the ranch is daar 'n kat wat in die donker geknyp word ... ," skerts Stella.

"Nou ja, laat ek in die pad val. Weet jy, places to go, people to see," sê Stella terwyl sy brand om dié brokkie nuus te gaan versprei.