JAAG 'N DROOM MY MASSEKIN

Talentvolle Tashreeq wil al ons kinders inspire

- 

OM TE sing en dans is in sy bloed, niemand het hom geleer hoe om dit te doen nie. Dié talente wat hy het, het hy gekry van die Man van Bo.

Dis ook dié einste talente wat sy lewe gered het en daarsonder weet hy nie waar hy sou geëindig het nie.

So vertel Tashreeq de Villiers (34), ook bekend as Ricky Vannie Frontline of Amafront. Die welbekende entertainer en sosialemedia-persoonlikheid van Woodstock het nie 'n maklike lewe gehad nie, maar is nou in die fleur van sy lewe en hy hoop om bruin kinders en jongmense te inspireer.

Tashreeq is deesdae te sien in e.tv se Kelders van Geheime en hoewel hy eers nou sy deurbraak op televisie maak, het hy al in 2013 met sy acting career begin, vertel hy trots.

“Ek het jare terug begin sing in die Klopse. Ek het in my broer se voetspore gevolg. Ek wou hê die mense moet vir my ook skree en hande klap wanneer ek perform. En natuurlik vir 'n pennie, 'n mens het 'n lekker geldjie gekry wanneer jy vir die Klopse gesing het,” vertel hy laggend.