సాగు దండుగ కాదు..పండుగ

ఎన్ని అడ్డంకులు వచ్చిన రూ.2లక్షలు రుణమాఫీ కాంగ్రెస్ పార్టీ మాట ఇచ్చిందంటే శిలాశాసనమే.. లక్ష వరకు తొలిదశలో రుణాల మాఫీ

- 

సచివాలయం నుంచి అట్టహాసంగా ప్రారంభం

తొలిదశలో 11.5 లక్షల మందికి

లక్షలోపు రుణాలకు రూ.6,098 కోట్లు జమ

ఇచ్చిన మాట నిలబెట్టుకోవడం కాంగ్రెస్కే సాధ్యం

హామీ ఇచ్చిన వరంగల్ లోనే రాహుల్ కృతజ్ఞతా సభ

హరీష్ మిమ్మల్ని రాజీనామా అడగం : సీఎం రేవంత్

హైదరాబాద్ 18 జూలై (ఆదాబ్ హైదరాబాద్) : రైతు రుణమాఫీ కార్యక్రమాన్ని సీఎం రేవంత్ రెడ్డి తెలంగాణ సచివాలయంలో ప్రారంభించారు. మొదటి విడతలో భాగంగా రూ. లక్ష లోపు రుణాలను మాఫీ చేయడం కోసం ఏకంగా రూ.6,098 కోట్లను ప్రభుత్వం రైతుల ఖాతాల్లో జమ చేసింది. దీని ద్వారా 11.5 లక్షల మంది రైతులకు లబ్ది కలగనుంది. రెండో విడతలో భాగంగా రూ. లక్షన్నర రుణమాఫీని ఈ నెలాఖరులోపు చేయనున్నారు. ఇక ఆగస్టు నెల దాటక ముందే రూ.2 లక్షల రుణమాఫీని అమలు చేయనున్నారు. రైతుల రుణమాఫీ కోసం మొత్తంగా రూ.31 వేల కోట్లను ఖర్చు చేయనున్నారు. సచివాలయంలో గురువారం రుణమాఫీ కార్యక్రమాన్ని నిర్వహించారు. ఈ పథకం ద్వారా లబ్ది పొందిన వివిధ జిల్లాల రైతులతో సీఎం రేవంత్ రెడ్డి ముఖాముఖిగా వీడియో కాన్ఫరెన్స్ మాట్లాడారు. పలుచోట్ల జిల్లాల్లో రైతు వేదికల్లో ఉన్న రైతులతో ముఖ్యమంత్రి వీడియో కాన్ఫరెన్స్ ద్వారా మాట్లాడేలా ఏర్పాట్లు చేశారు. రైతులకు రుణమాఫీపై వారి అభిప్రాయాలు తెలుసుకున్నారు. తమకు ఆనందంగా ఉందని, పలువురు రైతులు నేరుగా సిఎంకు వివరించారు. పదేళ్లుగా ఎదురుచూస్తున్నామని, ఇలా చేస్తారని ఊహించలేదన్నారు. రుణమాఫీపై సోనియా, రాహుల్ మాటకు కట్టుబడి నిర్ణయం తీసుకున్నామని అన్నారు.వరంగల్ డిక్లరేషన్ మేరకు అమలు చేస్తున్నామని అన్నారు. ఈ క్రమంలో వరంగల్లో ఎక్కడైతే రాహుల్ హామీ ఇచ్చారో అక్కడే కృతజ్ఞత సబను ఏర్పాటు చేసి, రాహుల్ను ఆహ్వానిస్తామని అన్నారు.