બાપ્પાને ચઢાવો બેસનના લાડુ કોપરાની બરફીનો ભોગ

જ દુંદાળા દેવ માટે ઘરે જ બનાવો ગણરાયાને પસંદ આવે છે એવો પ્રસાદ.

- ગરિમા બ્રહ્મભટ્ટ

ગણપતિ બાપ્પાના આગમનની તૈયારી પુરજોશમાં ચાલી રહી હશે. ચિત્રલેખાનો અંક તમારા હાથમાં આવશે ત્યારે એમની પધરામણીની ઘડીઓ ગણાતી હશે. દિવસમાં કયો પ્રસાદ ધરાવવો મીઠી મૂંઝવણ તમને થતી પણ થોભો. પ્રિયદર્શિની આ વખતે એના સ્વાદ વિભાગમાં એક નહીં, પરંતુ બે રૅસિપી તમને આપે છે. બન્ને ગણેશજીને ભાવે એવી છે અને એટલે જ એમને પ્રસાદમાં પણ ચડે છે. ગણપતિદાદાને મોદક અને લાડુ ખૂબ પ્રિય છે. માટે જ ગણપતિ ચોથના દિવસે ભાવિકો દાદાને લાડુનો પ્રસાદ ધરાવે છે, પરંતુ આજે આપણે ગજાનન માટે બેસનના લાડુ બનાવીશું. ઘરે જ કંદોઈ જેવા બેસનના લાડુ બનાવવા એકદમ સરળ છે.

બેસનના લાડુ સ્વાદમાં સારા હોય જ, સાથે સ્વાસ્થ્યવર્ધક પણ છે. બાળકોથી લઈને મોટેરાં બધાને લાડુ ખૂબ ભાવે છે. એમાં પણ જ્યારે દાદાને ધરાવેલા બેસનના લાડુની વાત આવે તો એની મીઠાશ કંઈક જુદી જ હોય છે.

તો ચાલો, દાદાને મનપસંદ બેસનના લાડુ બનાવીએ...

સામગ્રી

ત્રણ કપ કરકરો (જાડો દળેલો) ચણાનો લોટ (બેસન), એક કપ ઘી, એક કપ પીસેલી સાકર, પા કપ દૂધ, પાંચથી સાત નંગ કેસરના તાંતણા, અડધી ચમચી જાયફળનો પાવડર, અડધી ચમચી ઈલાયચીનો પાવડર, બદામ-પિસ્તા સજાવવા માટે.

રીત

* સૌપ્રથમ બેસન (ચણાનો લોટ)ને એકથી બે વખત બરાબર રીતે ચાળી લો. ત્યાર બાદ લોટને એક વાર હાથથી પણ મસળી લો, જેથી એમાં કોઈ ગાંઠ હોય તો છૂટી પડી જાય.

* દૂધને નવશેકું ગરમ કરી એમાં કેસરના તાંતણા ઉમેરીને ઠંડું કરવા મૂકી દેવું.