આપણી આજકાલ

ચકીબેનને ચીં... ચીં... કરવા દો ભાવિક ચૌહાણ: આઠ વર્ષ અગાઉ ચકલી માટે આવાં ઘર અને બર્ડ ફીડર બનાવ્યાં અને...

ગામેગામ અને મહોલ્લે મહોલ્લે મોબાઈલ ફોનના ટાવર ઊભા થવા લાગ્યા ત્યારથી આપણે આંગણે કે ઘરની બાલ્કનીમાં રોજ રમવા આવતી ચકીબેન આપણાથી રિસાઈ ગઈ છે. આજનાં બાળકો એમનાં દાદા-દાદી પાસે ચકો-ચકીની વાર્તા સાંભળતાં હશે, પણ ચકલી જોવાનું એમનાં નસીબમાં નથી એટલી હદે આ નાનકડા જીવનું અસ્તિત્વ જોખમમાં મુકાયું છે. નોબત તો એવી આવી કે ચકલીને નામશેષ થતી અટકાવવા વિશ્વવ્યાપી ઝુંબેશ શરૂ કરવી પડી. સંયુક્ત રાષ્ટ્રસંઘે ૨૦ માર્ચના દિવસને વિશ્વ ચકલી દિન તરીકે ઘોષિત કર્યો.

આ ઝુંબેશને કારણે હવે ચકીબેન ફરી દેખાતાં થયાં છે. એ રીતે ઘણા લોકોની મહેનત લેખે લાગી છે. એમાં મોટાં શહેરોના લોકો છે તો કચ્છના કુકમા । જેવા નાના ગામના કૉલેજિયન યુવાનો પણ ખરા.