ડગલું ભર્યું કે પાછું ના હટવું...ના હટવું

દામ્પત્યજીવનમાં નડેલી મુશ્કેલીથી નાસીપાસ થવાને બદલે બમણી ઊર્જાથી ઝઝૂમીને સફળતાની એક પછી એક સીડી ચડી બહુ નાની ઉંમરે વિશ્વવિખ્યાત અમેરિકન કંપનીના ગ્લોબલ પ્રોજેક્ટ મૅનેજરના પદ સુધી પહોંચનારી કિંજલ જોશીનું જીવન પ્રેરણાદાયી છે.

- કેતન મિસ્ત્રી (મુંબઈ)

ગુજરાતના નાનકડા ગામડેથી ૨૧ વર્ષની એક નવોઢા અમેરિકાના ન્યુજર્સી રાજ્ય મધ્યે આવેલા નેવાર્ક ઍરપોર્ટની બહાર નીકળે છે ને જીવનમાં કદીય ન અનુભવેલી એવી કાતિલ ઠંડી એના શરીરનો ભરડો લે છે. કાળી ડિબાંગ રાતનું સામ્રાજ્ય સર્વત્ર છવાયેલું છે. નેવાર્ક કૅબ સર્વિસની પીળા રંગની ટૅક્સીના ડરામણા પડછંદ ડ્રાઈવર એની પાસે આવે છેઃ હેય, યુ નીડ ટૅક્સી?

ઓહ નો...

આશરે ૧૮-૧૯ વર્ષ પહેલાંની એ રાત યાદ આવતાં આજે પણ એના શરીરમાંથી ભયનું લખલખું પસાર થઈ જાય છે. એનું નામ કિંજલ જોશી. અમેરિકા મધ્યે ફિલાડેલ્ફિયામાં વસવાટ. વિશ્વવિખ્યાત ડાઉ કેમિકલ્સમાં રિસર્ચ સાયન્ટિસ્ટ. કંઈકેટલા એવૉર્ડ્સ, ૧૭થી વધુ પેટન્ટ એના નામે બોલે છે. કંપનીનું પ્રતિનિધિત્વ કરવા એ દેશ-દુનિયામાં પ્રવાસ કરે છે, વૈશ્વિક સ્તરના સેમિનારમાં એ સ્પીચ આપે છે. જો કે અહીં સુધીનો પ્રવાસ એટલો સરળ નહોતો.

કિંજલનો જન્મ ઉત્તર-મધ્ય ગુજરાતના લુણાવાડા પાસે મુડાવેખ ગામમાં. માતા-પિતા બન્ને ડૉક્ટર. સ્વાધ્યાય પરિવારના દાદાજી-પાંડુરંગ શાસ્ત્રીનાં અનુયાયી અને એમના વિચારોથી પ્રભાવિત એટલે આ દંપતીએ સેવાની ધૂણી ધખાવી હતી. દાદાની અનેકવિધ સ્વાધ્યાય પ્રવૃત્તિ વચ્ચે જ કિંજલનો ઉછેર. મહેસાણાની બે સ્કૂલમાં ગુજરાતી-અંગ્રેજી માધ્યમમાં શાળાશિક્ષણ. પ્રારંભથી એ ભણવામાં હોશિયાર.