વેલ ડન મોદીભાઈ, વેલ ડન ટીમ ઈન્ડિયા...

ઈઝરાયલ વતી જાસૂસી કરવાના ગંભીર આરોપસર કતારમાં જેમને ફાંસી ઘોષિત થઈ હતી એવા ભારતીય નૌકાદળના આઠ નિવૃત્ત અધિકારીઓની સજા રદ કરાવી હેમખેમ પાછા લઈ આવવા પાછળ ભારતની મુત્સદ્દીગીરી કામ કરી ગઈ.

- સમીર પાલેજા

૫રદેશ કમાવા ગયેલા પિતા, પતિ, ભાઈ કે પુત્રને ત્યાંની સરકાર અચાનક જેલમાં ખોસી દે, જાસૂસીના આરોપી બનાવી કેસ સાબિત કરીને ફાંસીની સજા સંભળાવી દે તો ઘરના પર શું વીતે? છેક ઓગસ્ટ, ૨૦૨૨થી હમણાં સુધી આઠ ભારતીય પરિવાર, ભારત સરકાર તથા દેશના કરોડો સંવેદનશીલ નાગરિકોનો જીવ અધ્ધર હતો, કારણ કે પશ્ચિમ એશિયાના એક ઈસ્લામિક દેશ કતારની ખાનગી કંપનીમાં કામ કરતા આઠ પૂર્વ ભારતીય નૌસૈનિકોને આ રીતે જ કતારમાં ફાંસીની સજા સંભળાવવામાં આવી હતી.

આ કેસના બૅકગ્રાઉન્ડમાં જઈએ તો કતાર દેશને ભારત સાથે વેપારી સંબંધો ખરા. ભારતના પ્રવાહી કુદરતી વાયુ (એલએનજી)ની ૪૦ ટકા જરૂરત કતાર પૂરી કરે છે તો ભારતથી ચોખા, જ્વેલરી, રિફાઈન્ડ પેટ્રોલિયમ, વગેરેની નિકાસ કતારમાં થાય છે. અલબત્ત, ભારતની નિકાસ કરતાં આયાતનો આંકડો ઘણો મોટો છે. જો કે કતારમાં નોકરી કરતા લાખો ભારતીયો ત્યાં કમાઈને અબજોનું હૂંડિયામણ ભારત પાછું મોકલે છે. જાણીને નવાઈ લાગશે કે કતારની કુલ વસતિમાં હિંદુઓની સંખ્યા ૧૫.૯ ટકા છે, જેમાં ભારત ઉપરાંત બાંગ્લાદેશ, પાકિસ્તાન, નેપાળ અને શ્રીલંકાના હિંદુઓ પણ છે.

મોદી-જયશંકરના અથાક પ્રયાસ પછી કતારના સત્તાધીશોએ ભારતીય કેદીઓને મુક્ત કર્યા.