પરદેશી પોલિટિકલ જાસૂસોની ભેદી સૃષ્ટિ..

શું દેશ કે શું વિદેશ, રાજકારણમાં પ્રાઈવેટ ડિટેક્ટિવની બોલબાલા બધે છે.

- કેતન મિસ્ત્રી (મુંબઈ)

કાગડા બધે કાળા જ હોય. દેશ અમેરિકા હોય એથી ત્યાં કંઈ કાગડા ધોળા ન હોય. છેલ્લાં કેટલાંક વર્ષથી અહીંના રાજકારણીઓ અને એમના કાર્યકરો દ્વારા ભાડે રાખવામાં આવેલા જાસૂસો જાહેર જીવનના ખૂણેખાંચરે જઈને વિરોધીઓ વિશે જાતજાતની સ્ફોટક માહિતી ભેગી કરી હોવાના અનેક કિસ્સા બહાર આવ્યા છે.

અમેરિકામાં પ્રાઈવેટ ડિટેક્ટિવમાં ખાસ તો નિવૃત્ત પોલીસ અધિકારીઓ, એફબીઆઈ કે સીઆઈએ જેવી સરકારી જાસૂસી સંસ્થાના નિવૃત્ત એજન્ટો, ભૂતપૂર્વ સરકારી વકીલો તથા રિટાયર થયેલા પત્રકારો હોય છે. નિવૃત્તિ બાદ આવા ઘણા અધિકારીઓ પોતાની પ્રાઈવેટ ડિટેક્ટિવ એજન્સી ચલાવતા હોય છે. આ લોકો ભાગ્યે જ કાયદાનું પાલન કરે છે, કેમ કે વર્ષોથી આ જ રીતે કામ કરવાની એમને આદત પડી ગઈ હોય છે. એ પોતાના માણસોને (જાસૂસોને) પત્રકાર અથવા પ્રચાર કાર્યકર, પક્ષના વૉલિન્ટિયર બનાવીને શિકાર (રાજકારણી) પાસે મોકલે છે, જે ફોન રેકૉર્ડ્સ તથા મેડિકલ હિસ્ટરીની ખણખોદ કરીને રાજકારણીઓની ભૂતપૂર્વ પત્ની, પ્રેમિકા, એમની સાથે અગાઉ કામ કરી ચૂકેલા સ્ટાફને શોધી કોઈ પણ બહાને માહિતી કઢાવે છે.

ખાસ તો એમને વિરોધી રાજકારણીની કારકિર્દી જોખમમાં આવી જાય એવા ગોટાળા શોધવાનું કહેવામાં આવે છે, જેમ કે ભૂતપૂર્વ (કે વર્તમાન) ગર્લફ્રેન્ડ, ભૂતપૂર્વ પત્ની, લગ્નેતર સંબંધ, અનૌરસ સંતાન, છૂપી સંપત્તિ, કરચોરી, આર્થિક ગોટાળા, વગેરે.

નિવૃત્ત પોલીસ અધિકારી, એફબીઆઈ કે સીઆઈએ એજન્ટ અથવા સરકારી વકીલ જાસૂસ હોય તો એનો ફાયદો એ કે ફોન કંપની તથા સરકારી સંસ્થામાં એમના મળતિયા હોવાને લીધે કામ સરળ થઈ જાય. તો નિવૃત્ત પત્રકારોનો ફાયદો છે છાપાં-મૅગેઝિન-ન્યૂઝચૅનલોમાં એમના વર્ષોજૂના મિત્રો. આ લોકો નેગેટિવ ઈન્ફર્મેશન (કો’ક રાજકારણીનાં કપડાં ઉતારી દેતી માહિતી) છપાવી આપવામાં મદદરૂપ થાય છે.

છેલ્લા થોડા સમયમાં અમેરિકાના રાજકારણમાં જે ગંદવાડ પેઠો છે એ માટે રાજકીય નિરીક્ષકો ડોનાલ્ડ ટ્રમ્પને જવાબદાર માને છે.