ഏപ്രിൽ മുതൽ വൈദ്യുതി ബില്ല് കുതിക്കും എങ്ങനെ പിടിച്ചു നിർത്താം?

ജാഗ്രത പാലിച്ചില്ലെങ്കിൽ നിങ്ങളുടെ ബില്ല് വരും മാസങ്ങളിൽ രണ്ടോ മൂന്നോ മടങ്ങായാലും അത്ഭുതപ്പെടാനില്ല

- 

കൊടുംചൂടിൽ ഫാനും എസിയും ഇല്ലാതെ രാത്രിയും പകലും തള്ളിനീക്കാനാകാത്ത സ്ഥിതിയാകുമെന്നതിനാൽ എല്ലാ വീടുകളിലും വൈദ്യുതിബില്ല് വർധിക്കുമെന്നത് ഉറപ്പ്. എന്നാൽ ഇത്തവണ എരിതീയിൽ എണ്ണയൊഴിക്കാനായി കെഎസ്ഇബിയുടെ രണ്ടുതരം നിരക്കുവർധനയുണ്ട് ഏപ്രിൽ ഒന്നുമുതൽ. അതായത്, ജാഗ്രത പാലിച്ചില്ലെങ്കിൽ നിങ്ങളുടെ ബില്ല് വരും മാസങ്ങളിൽ രണ്ടോ മൂന്നോ മടങ്ങായാലും അത്ഭുതപ്പെടാനില്ല. ഇവിടെ ബിൽ തുക പിടിച്ചുനിർത്താൻ എന്തെങ്കിലും മാർഗമുണ്ടോ? അതിന് ആദ്യം വർധന എങ്ങനെയെല്ലാം എന്നറിയണം.

ബിൽ തുക കൂടുന്നത് മൂന്നു തരത്തിൽ

1 കഴിഞ്ഞ ഡിസംബറിൽ വൈദ്യുതിചാർജ് കൂട്ടിയപ്പോൾ തന്നെ 2025 ഏപ്രിൽ മുതൽ യൂണിറ്റിന് 12 പൈസയുടെ വർധനയുണ്ടാകും എന്നു പ്രഖ്യാപിച്ചിട്ടുണ്ട്. ജനുവരിയിൽ കൂട്ടിയ 16 പൈസ കൂടിയാകുമ്പോൾ കഴിഞ്ഞ നാലു മാസത്തിൽ 28 പൈസയാണ് യൂണിറ്റിനു വർധിക്കുന്നത്. ഇത് എല്ലാത്തരം ഉപയോക്താക്കൾക്കും ബാധകമാണ്.

അതോടൊപ്പം മാസം 250 യൂണിറ്റിൽ കൂടുതൽ ഉപയോഗിക്കുന്നവർക്കെല്ലാം വൈകിട്ട് ആറു മുതൽ രാത്രി പത്തുവരെ 25% ശതമാനം കൂടിയ നിരക്ക് ഈടാക്കും. ടിഒഡി എന്ന പുതിയ ബില്ലിങ് രീതി ഏപ്രിൽ ഒന്നുമുതൽ നടപ്പാക്കുന്നതിനാലാണിത്. സിംഗിൾ ഫേസ് കണക്ഷൻ ഉള്ളവർക്കും ടിഒഡി ബാധകമാകുമെന്ന് റെഗുലേറ്ററി കമ്മിഷൻ വ്യക്തമാക്കിയിട്ടുമുണ്ട്. അതോടെ കേരളത്തിലെ ഒരു കോടിയോളം വരുന്ന ഗാർഹിക ഉപയോക്താക്കളിൽ എട്ടുലക്ഷത്തോളംപേർക്കും ഈ 25% അധിക നിരക്ക് ബാധകമാകും. മാസം 250 യൂണിറ്റിലധികം ഉപയോഗിക്കുന്നവർക്ക് 12 പൈസയുടെ വർധനയ്ക്കു മേലാണ് രാത്രിയിലെ 25% വർധനകൂടി വരുന്നത്.