ഹരിത വീടുകളിലെ ജല സംരക്ഷണം

മഴവെള്ള സംരക്ഷണത്തിലൂടെയും ഗ്രേ വാട്ടർ ശുദ്ധീകരിച്ച് ഉപയോഗിക്കുന്നതിലൂടെയും ജലക്ഷാമം കുറയ്ക്കാം

- 

ശുദ്ധജലം പരിമിതമായിക്കൊണ്ടിരിക്കുന്നതിനാൽ ഇന്ന് ജലസംരക്ഷണത്തിന് പ്രാധാന്യമേറെയാണ്. ലോകത്തിൽ ശുദ്ധജലത്തിന്റെ അളവ് വളരെ കുറവായതിനാൽ പരിസ്ഥിതിക്ക് ഗുണകരമാകുന്ന തരത്തിലാണ് ഹരിത കെട്ടിടങ്ങൾ രൂപകൽപന ചെയ്യുന്നത്. കുറഞ്ഞ അളവിൽ ജലം ഉപയോഗിക്കുന്നത് അതിന്റെ ഭാഗമാണ്.

മഴവെള്ളം ശേഖരിച്ച് ഉപയോഗിക്കുക, വെള്ളം പാഴാകാതിരിക്കാൻ ഒഴുക്കു കുറഞ്ഞ ടാപ്പുകൾ സ്ഥാപിക്കുക തുടങ്ങിയ ആശയങ്ങളാണ് ഹരിത വീടുകളിൽ നടപ്പാക്കേണ്ടത്.

വെള്ളം കുറച്ച് ഉപയോഗിക്കുന്നതിലൂടെ പരിസ്ഥിതി സംരക്ഷിക്കാനും വാട്ടർ ബില്ല് കുറയ്ക്കാനും ആളുകൾക്ക് താമസിക്കാനും ജോലി ചെയ്യാനുമുള്ള ആരോഗ്യകരമായ അന്തരീക്ഷം സൃഷ്ടിക്കാനും ഹരിത കെട്ടിടങ്ങൾ സഹായിക്കുന്നു.

നഗരങ്ങൾ വളരുന്നതിനനുസരിച്ച് സുസ്ഥിരമായ ഭാവിക്ക് കെട്ടിടങ്ങളിൽ ജലസംരക്ഷണം നടപ്പാക്കേണ്ടത് അനിവാര്യമാണ്.

മഴവെള്ള സംഭരണം

മേൽക്കൂരയിലോ ടെറസിലോ തുറസ്സായ സ്ഥലങ്ങളിലോ വീഴുന്ന മഴവെള്ളം ഒഴുകിപ്പോയി പാഴാകുന്നതിനു പകരം ശേഖരിച്ച് സംഭരിക്കുന്ന പ്രക്രിയയാണ് മഴവെള്ള സംഭരണം. ഭാവിയിലെ ഉപയോഗത്തിന് മഴവെള്ളം ശേഖരിച്ച് സംഭരിക്കാനുള്ള സംവിധാനം ഹരിത ഭവനത്തിൽ അത്യാവശ്യമാണ്.

വീടുകളിൽ, ഈ വെള്ളം ടാങ്കുകളിൽ സംഭരിക്കാം. അല്ലെങ്കിൽ ഭൂഗർഭജലം റീ ചാർജ് ചെയ്യുന്നതിന് ഭൂമിയിലേക്ക് ഇറങ്ങാൻ അനുവദിക്കാം. മുനിസിപ്പൽ കുടിവെള്ളവിതരണത്തെ ആശ്രയിക്കുന്നതു കുറയ്ക്കാനും വാട്ടർ ബില്ല് കുറയ്ക്കാനുമുള്ള മികച്ചതും പരിസ്ഥിതി സൗഹൃദപരവുമായ മാർഗമാണിത്.