திடுக்கிடவைக்கும் தகவல் திருட்டு!

பாய்ஸ் படத்தில், கோயில் ஆண்டியாக இருக்கும் செந்தில், தன்னிடம் வயிற்றுப் பாட்டுக்கு வேலைக்கு வந்த மாணவன் கோபித்துக்கொண்டு புறப்படும்பது ஒரு டைரியை எடுப்பார். அதில், ஒவ்வொரு நாளும் எந்தக் கோயிலில் பொங்கல் போடுவார்கள், எங்கு புளியோதரை போடுவார்கள் என்ற விவரம் இருக்கும்.

- நெல்லை பரிதி

'தம்பி, நான் உனக்கு கொடுக்குறது இன்ஃபார்மேஷன்... இது தான் முக்கியம்' என்பார்.

அதுபோலத்தான், ஆதார், வங்கி கேஒய்சி, பள்ளி நுழைவு ஆவணங்களில் இருக்கும் மக்கள், மாணவர்களின் தனிப்பட்ட தகவல்களை திருடி, அதன்மூலம் பிசினஸ் வலைவீசும் நிறுவனங்களும் உள்ளன.

தமிழ்நாடு முழுவதும் 10 மற்றும் பிளஸ்2 மாணவர்களுக்கு பொதுதேர்வு நடந்து வந்த நிலையில், மாணவர்களின் சுயவிவரங்கள் வேண்டும் என்றால் இ-மெயில் மற்றும் தொலைபேசியில் தொடர்பு கொள்ளுங்கள் என்ற பதிவோடு ஆடியோ ஒன்று வாட்ஸ் ஆப் உள்ளிட்ட சமூக வலைத்தளங்களில் பரவியது.

அந்த ஆடியோவில், 'விருதுநகர், தென்காசி, திருச்சி, மதுரை என 20 மாவட்ட மாணவர்களின் சுய விவரம் எங்களிடம் உள்ளது. இந்த விவரம் உங்களுக்கு வேண்டும் என்றால், ஒரு மாவட்டத்தில் உள்ள பிளஸ்2 மாணவர்களின் சுய விவரங்களுக்கு ரூ.5 ஆயிரம், 10ஆம் வகுப்பு மாணவர்களின் சுய விவரங்களுக்கு ரூ.3 ஆயிரம் பணம் செலுத்தினால் விவரங்கள் வழங்கப்படும்' என்று திருமண தகவல் நிலையத்தார் போல் ஒருவர் பேசுவது வெளியானது.

அதே நேரம், பள்ளிக் கல்வித்துறையில் 10 மற்றும் பிளஸ்2 மாணவர்களின் முகவரி, தொடர்பு எண்கள் என அனைத்து சுய விவரங்களும் தனியார் பொறியியல், தொழில்நுட்ப நிலையங்களின் நிர்வாகிகளுக்கு சென்று விட்டது.

அது குறித்து மத்திய குற்றப்பிரிவு சைபர் க்ரைம் போலீசார் நடத்திய விசாரணையில், ஆன்லைன் மூலம் மோசடி நடந்தது தெரிய வந்தது. மாணவர்களின் சுய விவரங்கள் அனைத்தும் வாட்ஸ் ஆப் மற்றும் இ-மெயில் மூலம் தனியார் கல்வி நிறுவனங்களுக்கு விற்பனை செய்யப்பட்டிருந்தது.

இன்னொருபக்கம் 'எமிஸ்' என்ற கல்வி மேலாண்மை செயலியின் பதிவேற்ற செயல்முறைகளை யுடியூப்பில் வெளியிட்டு லட்சக்கணக்கான ஆசிரியர்களை கட்டாயமாக பார்க்க வைத்து சிலர் கல்லா கட்டிய சர்ச்சை வேறு புயலை கிளப்பியது.

அதாவது, சென்னை எமிஸ் அலுவலகத்தில் பணியாற்றும் சில ஆசிரியர்கள் கல்வித்துறை பெயரில் சில யுடியூப் சேனல்களை நடத்தி, மாவட்ட கல்வி அதிகாரிகள், ஆசிரியர்களுக்கு தெரிவிக்க வேண்டிய செயல் முறைகள், எமிஸில் மேற்கொள்ள வேண்டிய பதிவேற்றங்களை வீடியோவாக வெளியிட்டு லட்சக்கணக்கான 'பார்வை', 'லைக்'குகளை பெற்று பணம் ஈட்டுகின்றனர்.