എള്ള്

പല്ല്, മുടി, ത്വക്ക് സംരക്ഷണത്തിനു ഫലപ്രദം

- ഡോ. ഗോപാലകൃഷ്ണൻ വലിയവീട്ടിൽ

ആയുർവേദ ഔഷധങ്ങളുടെ നിർമാണത്തിൽ ഏറ്റവുമധികം ഉപയോഗിക്കുന്ന അസംസ്കൃത വസ്തുക്കളിലൊന്നാണ് എള്ളും എള്ളെണ്ണയും. ആഹാരമായും ഔഷധമായും നമ്മുടെ നിത്യജീവിതത്തിൽ സുപ്രധാന സ്ഥാനമുണ്ട് എള്ളിന്. ഇനഭേദമനുസരിച്ച് കറുപ്പ്, തവിട്ട്, വെള്ള, ചുവപ്പ് എന്നിങ്ങനെ പല നിറത്തിലുള്ള എള്ള് വിപണിയിൽ ലഭ്യമാണ്. വെളുത്ത നിറമുള്ളതിലാണ് എണ്ണ കൂടുതൽ അടങ്ങിയിട്ടുള്ളത്. എന്നാൽ കറുത്തതിനാണ് ഗുണം കൂടുതൽ. എള്ളിന്റെ വിത്ത്, എണ്ണ, ചെടി യുടെ ഇല, തണ്ട് എന്നിവയെല്ലാം ഔഷധമായി ഉപയോ ഗിക്കുന്നുണ്ട്. മറ്റു ഭാഷകളിൽ തിലം, തിൽ, തിലഗച്ഛ, ജിൻജെല്ലി എന്നെല്ലാം അറിയപ്പെടുന്ന എള്ളിന്റെ ശാസ്ത്രീയ നാമം Sesamum indicum Linn.