കാക്ക കൂടുകൂട്ടാത്ത കർക്കടകം

കൃഷിവിചാരം

-  കെ.ആർ. പ്രമോദ് ഫോൺ: 9447809631 ഇ- മെയിൽ: krpramodmenon@gmail.​com

ഉണ്ണി ഉച്ചയ്ക്ക് ഉണ്ണാറില്ല. വിശപ്പു മാറ്റാൻ സ്കൂളിലെ കിണറിൽ നിന്നു വെള്ളം കോരിക്കുടിക്കും. വൈകുന്നേരം നടന്നു തളർന്നു വീട്ടിലെത്തുമ്പോൾ ഒരു പാത്രം കഞ്ഞി കിട്ടിയാലായി. അന്നും അവൻ സ്കൂൾ വിട്ടു. വീട്ടിലെത്തി. പക്ഷേ, അമ്മയെ അവിടെ കണ്ടില്ല. അയലത്തുനിന്ന് കുറച്ച് അരിയും സാധനങ്ങളും കടം വാങ്ങാൻ പോയതായിരുന്നു അവർ.

അമ്മ തിരിച്ചെത്തിയപ്പോൾ അതാ, അപ്രതീക്ഷിതമായി ഒരു അതിഥി വന്നുകയറുന്നു. അയാളെ സൽക്കരിച്ചതോടെ അപ്പോഴുണ്ടാക്കിയ ചോറും കറിയും തീർന്നു. ഉണ്ണി വിശന്നു തളർന്നിരിപ്പായി. സന്ധ്യ കഴിഞ്ഞപ്പോൾ ചാക്കരി വാർത്ത വെള്ളം ചൂടാക്കി അമ്മ അവനു കൊടുത്തു. അസഹ്യ ദുർഗന്ധമുള്ള വെള്ളം നാലു പ്ലാവില കുടിച്ചപ്പോൾ ഛർദിക്കാൻ വരുന്നതുപോലെ തോന്നി. ഉണ്ണി കൈ കഴുകി എഴുന്നേറ്റു. രാത്രി ഉറക്കം വന്നില്ല. തിരിഞ്ഞും മറിഞ്ഞും കിടന്നു. വിശപ്പ് ഒരു തീപ്പന്തമായി, ചൂടുള്ള ആവിയായി, ഒരു നനുത്ത വേദനയായി ചുറ്റും ഇഴഞ്ഞുനടന്നു.