തരിശുഭൂമിയിൽ വിളഞ്ഞ ഹരിതവിസ്മയം

നഴ്സറിയും കൃഷിയും കേറ്ററിങ്ങുംവരെ വിജയകരമായി നടത്തുന്നു

- ഡി. ജയകൃഷ്ണൻ

പടിഞ്ഞാറെ കൊല്ലം ഹരിതലക്ഷ്മിയിൽ തക്കാളിയുടെയും മുളകിന്റെയും വഴുതനയുടെയും വെണ്ടയുടെയും പയറിന്റെയും ഒക്കെ തൈകൾ വളരുന്നത് കൃഷിയിടങ്ങളിലേക്കു മാത്രമല്ല, ഒരു സ്വപ്നത്തിലേക്കു കൂടിയാണ്. സംഘാംഗങ്ങളായ19 വനിതകൾ അടുത്തുതന്നെ തായ്ലൻഡിലേക്കു നടത്തുന്ന യാത്രയുടെ ചെലവു കണ്ടെത്തുകയെന്ന വലിയ ലക്ഷ്യത്തിലേക്കും ഇവിടെ മുളയ്ക്കുന്ന തൈകളുടെ വേരു പൊടിക്കുന്നുണ്ട്. 30, 000 ൽ തുടങ്ങി പ തിവർഷം15 ലക്ഷത്തോളം പച്ചക്കറിത്തൈകൾ ഉൽപാദിപ്പിച്ച് വിപണനം നടത്തുന്ന നിലയിലേക്കു വളർന്നിരിക്കുന്നു. കൊല്ലം മേടമുക്കിലെ ഹരിതലക്ഷ്മി സ്വാശ്രയസംഘത്തിന്റെ നഴ്സറി സംരംഭം.

എട്ടു വർഷം കൊണ്ട് നിവർന്നു നിൽക്കാൻ തക്ക കരുത്തു നേടിയ ഈ വനിതാ കൂട്ടായ്മയുടെ പിറവി തന്നെ യാദൃച്ഛികം. സംഘം സെക്രട്ടറി എം. രാജശ്രീയുടെ വീടിന്റെ മട്ടുപ്പാവിലെ പച്ചക്കറിക്കൃഷിയിടം 2015 ഓഗസ്റ്റിൽ സന്ദർശിച്ച സ്ഥലം കൃഷിഭവനിലെ ഉദ്യോഗസ്ഥരാണ് ഈ ഹരിതവിജയത്തിനു വിത്തിട്ടത്. അവർ നൽകിയ ആശയം അധ്യാപകരും വിരമിച്ച അധ്യാപകരും വീട്ടമ്മമാരും ഉൾപ്പെടുന്ന പെൺകൂട്ടായ്മയുടെ മനസ്സിലേക്കും തുടർന്ന് മണ്ണിലേക്കും രാജശ്രീ പറിച്ചുനട്ടതോടെ 2015 ഓഗസ്റ്റ് 22ന് ഹരിതലക്ഷ്മി പിറന്നു.