ഇതാ ഇവിടെയുണ്ട് സാൽമണിന്റെ സഹോദരി

കിലോയ്ക്ക് 1000 രൂപ വിലയുള്ള എക്സോട്ടിക് മത്സ്യയിനമായ റെയിൻബോ ട്രൗട്ട് മൂന്നാറിൽ

- ജോബി ജോസഫ്

സാമ്രാജ്യം വെട്ടിപ്പിടിക്കാൻ കടലും കരയും സഞ്ചരിച്ച സായിപ്പിന് സ്വന്തം കുടുംബത്തെക്കാൾ"മിസ് ചെയ്ത ഒരു കാര്യമുണ്ടായിരുന്നു; അറ്റ്ലാന്റിക് സാൽമണിന്റെ അതുല്യമായ രുചി. അറ്റ്ലാന്റിക് സാൽമണിനോടും സാൽമണിന്റെ സഹോദരീമത്സ്യമായ ട്രൗട്ടിനോടും എന്നും അത്രയേറെ പ്രിയമുണ്ട് സായിപ്പിന്.

തേയിലത്തോട്ടങ്ങൾ ഒരുക്കാനായി 19-ാം നൂറ്റാണ്ടിൽ മൂന്നാറിൽ താവളമുറപ്പിച്ച വിദേശികളിൽ നല്ല പങ്കും സ്കോട്ലൻഡുകാരായിരുന്നു. ജന്മദേശമായ സ്കോട്ലൻഡിന് സമാനമായ ഭൂപ്രകൃതിയും കാലാവസ്ഥയും തന്നെയായിരുന്നു ആകർഷണം. നായാട്ടും കുതിരസവാരിയും പോലുള്ള ഉല്ലാസകേളികൾക്കു പറ്റിയ പ്രദേശമെന്ന നിലയിലും മൂന്നാർ അവർക്കു പ്രിയങ്കരമായി. എങ്കിലും ഇഷ്ടവിനോദമായ ചൂണ്ടയിടലും കൊതിയൂറുന്ന മത്സ്യവിഭവങ്ങളും ഇവിടെയില്ലെന്നത് എന്നും അവരെ സങ്കടപ്പെടുത്തി. പക്ഷേ, ചുണ്ടു നനച്ച് ചുമ്മാതിരുന്നില്ല സായിപ്പ്. വലിയൊരു രാജ്യം ഭരിക്കാനും ചെറിയൊരു മത്സ്യം പൊരിക്കാനും ഒരേ ശ്രദ്ധ ആവശ്യമെന്ന് ചൈനീസ് ഗുരു ലാവേസു പറയുന്നുണ്ട്. സൂക്ഷിച്ചില്ലെങ്കിൽ രണ്ടും നാശമാകും. രാജ്യം കൈപ്പിടിയിലൊതുക്കാൻ കാണിച്ച ക്ഷമയോടെ ട്രൗട്ട് മത്സ്യത്തെ ഇന്ത്യയിൽ ബ്രീഡ് ചെയ്തെടുക്കാനും സായിപ്പ് ശ്രമം തുടങ്ങി. പക്ഷേ, അത്രത എളുപ്പമായിരുന്നില്ല.